ప్రపంచ మార్కెట్‌లో కంపెనీల(Global Business) శక్తిని కొలవడానికి లాభాలు, మార్కెట్ క్యాప్, ఉద్యోగుల సంఖ్య వంటి అంశాలు ఉన్నప్పటికీ, వ్యాపారం యొక్క అసలైన ప్రమాణం ఆదాయం అని నిపుణులు చెబుతున్నారు.

తాజా గణాంకాల ప్రకారం ప్రపంచంలో అత్యధిక ఆదాయం సంపాదిస్తున్న టాప్ 10 కంపెనీల జాబితా వెలువడింది. ఈ జాబితా మరోసారి అమెరికా, చైనా వంటి శక్తివంతమైన దేశాల ఆధిపత్యాన్ని స్పష్టంగా చూపించింది. ఈ జాబితాలో అమెరికాకు చెందిన కంపెనీలు ఏడు చోట్ల ఉండగా, చైనాకు చెందిన రెండు సంస్థలు, సౌదీ అరేబియాకు చెందిన ఒక సంస్థ టాప్ 10లో స్థానం సంపాదించాయి.

టాప్ 10లో వాల్మార్ట్, అమెజాన్ అగ్రస్థానం

అమెరికాకు చెందిన రిటైల్ దిగ్గజం వాల్మార్ట్ సుమారు 703 బిలియన్ డాలర్ల ఆదాయంతో ప్రపంచంలో అగ్రస్థానంలో నిలిచింది. ఈ-కామర్స్ రంగంలో అగ్రగామిగా ఉన్న అమెజాన్ దాదాపు 691 బిలియన్ డాలర్ల ఆదాయంతో రెండో స్థానంలో(Global Business) ఉంది. సౌదీ అరేబియా చమురు సంస్థ సౌదీ అరామ్‌కో మూడో స్థానాన్ని దక్కించుకుంది. చైనాకు చెందిన సినోపెక్, పెట్రోచైనా, అలాగే అమెరికాకు చెందిన యునైటెడ్ హెల్త్, ఆపిల్, బెర్క్‌షైర్ హాత్వే, CVS హెల్త్, మెక్‌కెసన్ వంటి సంస్థలు కూడా టాప్ 10లో చోటు సంపాదించాయి.

భారతీయ కంపెనీల స్థానం

ప్రస్తుతం ఆదాయం పరంగా ఏ భారతీయ కంపెనీ కూడా టాప్ 10 గ్లోబల్ జాబితాలోకి ప్రవేశించలేదు. భారతదేశం నుండి రిలయన్స్ ఇండస్ట్రీస్ సుమారు 114.6 బిలియన్ డాలర్ల ఆదాయంతో ప్రపంచవ్యాప్తంగా 65వ స్థానంలో నిలిచింది. LIC సుమారు 106.16 బిలియన్ డాలర్ల ఆదాయంతో 68వ స్థానంలో ఉంది. అలాగే ఇండియన్ ఆయిల్ కూడా టాప్ 100లో చోటు సంపాదించింది. ఈ గణాంకాలు 2024-2025 ఆర్థిక సంవత్సరానికి సంబంధించిన కంపెనీల పనితీరును ఆధారంగా తీసుకుని రూపొందించబడ్డాయి.