Cristiano Ronaldo: ఫుట్బాల్ ప్రపంచంలో తన అసాధారణ ఆటతీరుతో కోట్లాది మంది అభిమానులను సంపాదించుకున్న పోర్చుగల్ సూపర్స్టార్ క్రిస్టియానో రొనాల్డో తన అంతర్జాతీయ కెరీర్పై అత్యంత కీలక ప్రకటన చేశాడు.
ప్రస్తుతం జరుగుతున్న 2026 ఫిఫా ప్రపంచకప్ (FIFA World Cup 2026) టోర్నీనే తన కెరీర్లో చివరి మెగా ఈవెంట్ అని ఆయన అధికారికంగా వెల్లడించాడు. స్పెయిన్ జట్టుతో జరగబోయే అత్యంత కీలకమైన ‘రౌండ్ ఆఫ్ 16’ మ్యాచ్కు ముందు నిర్వహించిన మీడియా సమావేశంలో రొనాల్డో ఈ విషయమై స్పష్టతనిస్తూ, తన భవిష్యత్తుపై వస్తున్న రూమర్లకు చెక్ పెట్టాడు.
read also: Womens T20 World Cup: మహిళల టీ20 వరల్డ్ కప్లో ఆస్ట్రేలియాకు మరో టైటిల్
రేపటి మ్యాచే ఆఖరిది కాకూడదు:
మీడియా సమావేశంలో రొనాల్డో భావోద్వేగంగా మాట్లాడుతూ.. “ఈ మెగా టోర్నమెంట్ను నేను పూర్తిగా ఆస్వాదించాలనుకుంటున్నాను. ఎందుకంటే ఇదే నా కెరీర్లో చివరి ప్రపంచకప్. అయితే, రేపు స్పెయిన్తో జరగబోయే మ్యాచ్తోనే మా ప్రపంచకప్ ప్రస్థానం ముగిసిపోకూడదని మనస్ఫూర్తిగా కోరుకుంటున్నాను” అని తెలిపాడు. ప్రస్తుతం 41 ఏళ్ల వయసున్న రొనాల్డోకు ఇది ఆరో ప్రపంచకప్ కావడం విశేషం. ఈ టోర్నీలో ఇప్పటివరకు ఆడిన నాలుగు మ్యాచ్ల్లో ఆయన మూడు గోల్స్ సాధించాడు. ఇందులో ఒకటి నాకౌట్ దశలో వచ్చినదే. తన సుదీర్ఘ వరల్డ్ కప్ కెరీర్లో రొనాల్డో మొత్తం 11 గోల్స్ ఖాతాలో వేసుకున్నాడు.
Cristiano Ronaldo: రిటైర్మెంట్పై మీడియాకు చురకలు:
తన రిటైర్మెంట్పై పదేపదే ప్రశ్నలు వేస్తున్న విలేకరులపై రొనాల్డో కాస్త అసహనం వ్యక్తం చేశాడు. “నేను ఎప్పుడు బూట్లు పక్కన పెట్టాలనేది నా ఇష్టం. నేను అనుకున్నప్పుడే రిటైర్ అవుతాను, ఇతరులు కోరుకున్నప్పుడు కాదు. ఈ ప్రశ్నలు అడగడం వల్ల సమయం వృథా తప్ప ఏమీ ఉండదు. ప్రస్తుతానికి నా దృష్టంతా రేపటి మ్యాచ్ను గెలవడం పైనే ఉంది” అని తేల్చిచెప్పాడు. జట్టులో తన ప్రాధాన్యత గురించి చెప్తూ.. “మైదానంలో ఉన్నానా లేదా బెంచ్కే పరిమితమయ్యానా అనేది ముఖ్యం కాదు, పోర్చుగల్ జట్టు విజయం కోసం నా శరీరాన్ని, ఆత్మను అర్పిస్తాను. జట్టులో నా పాత్ర ఎప్పుడూ కీలకమే” అని అన్నాడు.
ట్రోఫీ గెలవడమే ఏకైక లక్ష్యం:
ఇదే తన చివరి ప్రపంచకప్ అయినప్పటికీ, ఒత్తిడి లేకుండా కప్పు గెలవాలనే బలమైన ఆశయంతో తమ జట్టు బరిలోకి దిగిందని రొనాల్డో ధీమా వ్యక్తం చేశాడు. “ప్రపంచకప్ గెలవాలనే నమ్మకం మాకు లేకపోతే అసలు మేమిక్కడ ఉండేవాళ్లమే కాదు. ఇదొక అద్భుతమైన ప్రయాణం. మ్యాచ్ మ్యాచ్కూ మా ప్రదర్శనను మెరుగుపరుచుకుంటున్నాం. ఇప్పటికే కొన్ని బలమైన జట్లు టోర్నీ నుంచి నిష్క్రమించాయి. కానీ మా జట్టు చాలా ప్రశాంతంగా, పక్కా ప్రణాళికతో శిక్షణ పూర్తి చేసుకుని సిద్ధంగా ఉంది” అని రొనాల్డో పేర్కొన్నాడు. ఏదేమైనా, ఈ ప్రపంచకప్తో మెగా టోర్నీలకు గుడ్ బై చెప్పనున్న రొనాల్డో, పోర్చుగల్ను విజేతగా నిలబెట్టి ఘనంగా వీడ్కోలు పలకాలని గట్టి పట్టుదలతో ఉన్నాడు.
Epaper: epaper.vaartha.com