Nxt Quantum OS v1.1 : భారతదేశంలో డేటా సార్వభౌమత్వానికి, వినియోగదారుల గోప్యతకు పెద్దపీట వేస్తూ Ai+ సంస్థ తమ స్మార్ట్ఫోన్ల కోసం 'Nxt Quantum OS v1.1' అప్డేట్ను అధికారికంగా అందుబాటులోకి తీసుకువచ్చింది.
వినియోగదారుల వ్యక్తిగత డేటాను వివిధ అప్లికేషన్లు ఎలా యాక్సెస్ చేస్తున్నాయనే దానిపై స్పష్టమైన అవగాహన, నియంత్రణ కల్పించేలా ఈ సరికొత్త ఆపరేటింగ్ సిస్టమ్ను తీర్చిదిద్దారు. డేటా భద్రత పట్ల నిబద్ధతతో 100% అప్లికేషన్ డేటా ట్రాఫిక్ను భారతదేశంలోని స్థానిక సర్వర్ల ద్వారానే మళ్లించేలా కఠినమైన చర్యలు చేపట్టారు. గూగుల్ కోర్ సేవలకు సంబంధించిన అత్యవసర ట్రాఫిక్ మినహా మిగిలిన మొత్తం డేటా నియంత్రణను దేశీయంగానే ఉంచుతున్నారు. సాంకేతికతపై వినియోగదారుల్లో నమ్మకాన్ని పెంచడమే తమ ముఖ్య లక్ష్యమని NxtQuantum Shift Technologies సీఈఓ మాధవ్ సేత్ ఈ సందర్భంగా స్పష్టం చేశారు.
NxtPrivacy డాష్బోర్డ్ ప్రత్యేకతలు: పారదర్శకతకు ప్రాధాన్యం
ఈ తాజా OS v1.1 అప్డేట్ ద్వారా ‘NxtPrivacy’ అనే ప్రత్యేక డాష్బోర్డ్ను వినియోగదారులకు పరిచయం చేశారు. దీని ద్వారా యాప్లకు ఇచ్చే అనుమతులను (Permissions) ఒకే చోట సులభంగా సమీక్షించడం, సవరించడం లేదా రద్దు చేయడం సాధ్యమవుతుంది. బ్యాక్గ్రౌండ్లో ఉన్నప్పుడు యాప్లు ఏ వనరులను వాడుకుంటున్నాయో వినియోగదారులు స్పష్టంగా తెలుసుకునేలా ప్రత్యేక నోటిఫికేషన్లు, అలర్ట్లు పొందుపరచబడ్డాయి. అంతేకాకుండా ‘ప్రాజెక్ట్ ఓపెన్ రివ్యూ 2.0’ ద్వారా సాంకేతిక నిపుణులు, ఎథికల్ హ్యాకర్లు, రివ్యూయర్లు ఈ పరికరాల భద్రతను ముందే పరీక్షించి సూచనలు ఇచ్చేలా Ai+ సంస్థ పూర్తి పారదర్శక విధానాన్ని అమలు చేస్తోంది.