అమ్మవారిని దర్శించుకునేందుకు తెల్లవారుజాము నుంచే భక్తులు పెద్ద సంఖ్యలో ఆలయానికి తరలివచ్చారు. విజయదశమి రోజున రాజరాజేశ్వరీ దేవి అలంకరణలో అమ్మవారిని దర్శించుకుంటే సకల శుభాలు కలుగుతాయని భక్తులు విశ్వసిస్తారు. దీంతో ఇంద్రకీలాద్రి పరిసరాలు భక్తులతో సందడిగా మారాయి. అమ్మవారి నామస్మరణలు, భక్తుల రాకపోకలతో ఆలయ ప్రాంతంలో ఆధ్యాత్మిక వాతావరణం నెలకొంది. తొమ్మిది రోజుల పాటు వైభవంగా సాగిన శరన్నవరాత్రి ఉత్సవాలు చివరి రోజుకు చేరుకోవడంతో భక్తులు అమ్మవారిని దర్శించుకునేందుకు ఆసక్తి చూపుతున్నారు.

క్యూలైన్లు కిక్కిరిసిన వేళ.. భారీగా తరలివచ్చిన భవానీ మాలధారులు

దసరా ఉత్సవాల చివరి రోజు కావడంతో ఇంద్రకీలాద్రిపై భక్తుల రద్దీ గణనీయంగా పెరిగింది. భక్తుల రాకను దృష్టిలో ఉంచుకుని కుమ్మరపాలెం, వినాయకుడి టెంపుల్‌ వైపు నుంచి రెండు క్యూలైన్లు ఏర్పాటు చేయగా, అవి భక్తులతో కిక్కిరిసిపోయాయి. సాధారణ భక్తులతో పాటు భవానీ మాలధారులు కూడా పెద్ద సంఖ్యలో అమ్మవారి దర్శనానికి తరలివచ్చారు. విజయదశమి సందర్భంగా అమ్మవారి దర్శనం చేసుకుని మొక్కులు చెల్లించుకోవాలని భక్తులు భావిస్తున్నారు. చివరి రోజు రద్దీ నేపథ్యంలో భక్తులు క్యూలైన్లలో క్రమశిక్షణ పాటిస్తూ ఆలయ సిబ్బంది సూచనలను అనుసరించాలని అధికారులు సూచిస్తున్నారు. దసరా ఉత్సవాల ముగింపు సందర్భంగా ఇంద్రకీలాద్రి భక్తజన సందోహంతో కళకళలాడుతోంది.

ఇంద్రకీలాద్రిపై శ్రీ దుర్గాదేవి అలంకారంలో కనకదుర్గమ్మ