దేశంలో వాణిజ్య అవసరాల కోసం గ్యాస్ సిలిండర్లను వినియోగించే వారికి చమురు సంస్థలు భారీ షాక్ ఇచ్చాయి. ఇరాన్ మరియు అమెరికా మధ్య నెలకొన్న ఉద్రిక్తతల నేపథ్యంలో గ్యాస్ ధరలు ఆకాశాన్నంటాయి.

వ్యాపార, వాణిజ్య అవసరాలకు వినియోగించే 19 కేజీల కమర్షియల్ గ్యాస్ సిలిండర్ ధరను ఆయిల్ కంపెనీలు భారీగా పెంచాయి. ఏకంగా రూ.993 పెంచుతూ నిర్ణయం తీసుకోవడంతో హోటళ్లు, రెస్టారెంట్లు మరియు చిన్న తరహా పరిశ్రమల నిర్వాహకులపై పెను భారం పడనుంది. ఈ పెంపుతో ఢిల్లీలో సిలిండర్ ధర రూ.3,071.50కి చేరగా, హైదరాబాద్‌లో ఇది రూ.3,314.30కి చేరుకుంది. గతంలోనే కమర్షియల్ సిలిండర్‌పై రూ.214 పెంచగా, ఇప్పుడు ఏకంగా వెయ్యి రూపాయల వరకు పెరగడం సామాన్య వ్యాపారులను ఆందోళనకు గురిచేస్తోంది.

Read Also : నేపాల్‌లో ఘోర రోడ్డు ప్రమాదం.. 17 మంది మృతి!

గృహ వినియోగదారులకు ఊరట: డొమెస్టిక్ ధరల్లో మార్పు లేదు

కమర్షియల్ గ్యాస్ ధరలు చుక్కలు చూపిస్తున్నప్పటికీ, సామాన్య గృహ వినియోగదారులకు మాత్రం చమురు సంస్థలు ఊరటనిచ్చాయి. 14.2 కేజీల డొమెస్టిక్ (గృహ) గ్యాస్ సిలిండర్ల ధరల్లో ఎలాంటి మార్పు చేయలేదు. గతంలో గృహ వినియోగ సిలిండర్‌పై రూ.60 పెంచినప్పటికీ, తాజా పెంపు నుంచి దీనిని మినహాయించారు. దీనివల్ల సామాన్య మధ్యతరగతి కుటుంబాల వంటగది బడ్జెట్‌పై తక్షణ ప్రభావం ఉండదు. అయితే, కమర్షియల్ గ్యాస్ ధరలు పెరగడం వల్ల బయట హోటల్ తిండి, ఇతర సేవలు ప్రియమయ్యే అవకాశం ఉంది.