Karachi Terror Attack: పాకిస్థాన్లోని అతిపెద్ద వాణిజ్య నగరం కరాచీ శనివారం రాత్రి భీకర పేలుళ్లు, కాల్పుల మోతతో దద్దరిల్లింది. నగరంలోని సింధ్ రేంజర్ల ప్రధాన స్థావరాన్ని లక్ష్యంగా చేసుకుని ఉగ్రవాదులు జరిపిన ఆత్మాహుతి దాడి, కాల్పుల ఘటనలో నలుగురు సైనికులు వీరమరణం పొందారు.
భద్రతా బలగాలు వెంటనే అప్రమత్తమై జరిపిన ఎదురుకాల్పుల్లో ఆరుగురు ఉగ్రవాదులు హతమవగా, మరొక ఉగ్రవాదిని సజీవంగా పట్టుకోవడంలో సైన్యం విజయవంతమైంది.
Read also:Iran US Air Strikes: మరోసారి ఇరాన్ స్థావరాలపై అమెరికా వైమానిక దాడులు
బాంబుల వాహనంతో దూసుకొచ్చిన ఉగ్రమూక.. జమాత్-ఉల్-అహ్రార్ ఘాతుకం!
కరాచీలోని గులిస్తాన్-ఎ-జౌహర్ ప్రాంతంలో ఉన్న సింధ్ రేంజర్ల హెడ్క్వార్టర్స్పైకి ఉగ్రవాదులు పేలుడు పదార్థాలతో నిండిన వాహనంతో ఆకస్మికంగా దూసుకొచ్చారు. ఆ వాహనాన్ని సైనిక స్థావరానికి ఢీకొట్టి పెద్ద ఎత్తున పేల్చివేశారు. ఆ వెంటనే మిగిలిన ఉగ్రవాదులు స్వయంచాలక ఆయుధాలతో లోపలికి చొరబడి విచక్షణారహితంగా కాల్పులకు తెగబడ్డారు. దాడి తీవ్రత దృష్ట్యా అదనపు పోలీసు బలగాలు, ప్రత్యేక కమాండోలను రంగంలోకి దించి ఉగ్రవాదులను మట్టుబెట్టారు.
ఈ ఘాతుకానికి తామే బాధ్యులమని తెహ్రీక్-ఎ-తాలిబన్ పాకిస్థాన్ (TTP) అనుబంధ విచ్ఛిన్న సమూహం 'జమాత్-ఉల్-అహ్రార్' అధికారికంగా ప్రకటించింది. ఈ దాడిపై సింధ్ ముఖ్యమంత్రి సయ్యద్ మురాద్ అలీ షా తీవ్ర ఆగ్రహం వ్యక్తం చేశారు. ఘటనపై ఉన్నత స్థాయి దర్యాప్తునకు ఆదేశించారు. ప్రస్తుతం ఆ ప్రాంతాన్ని సైన్యం పూర్తిగా అదుపులోకి తీసుకుని కూంబింగ్ నిర్వహిస్తోంది. ఈ ఘటనలో సామాన్య పౌరులకు ఎటువంటి ప్రాణనష్టం జరగలేదని అధికారులు ధ్రువీకరించారు.