కరీంనగర్‌ పోలీస్ శాఖలో భారీ కుంభకోణం.. మరణించిన వారికి జీతాలు!

కరీంనగర్ పోలీస్ కమిషనరేట్ కార్యాలయంలో వెలుగుచూసిన ఈ భారీ ఆర్థిక కుంభకోణం ప్రభుత్వ యంత్రాంగంలోని లోపాలను, కొందరు ఉద్యోగుల బరితెగింపును ఎత్తిచూపుతోంది.

రక్షక భట నిలయంలోనే చనిపోయిన వారి పేరుతో నిధులు దారిమళ్లడం రాష్ట్రవ్యాప్తంగా చర్చనీయాంశమైంది. ఈ కుంభకోణం వెనుక అత్యంత పక్కాగా వేసిన పథకం ఉంది. కమిషనరేట్‌లోని పే-సెక్షన్‌లో పనిచేసిన ఒక ఉద్యోగి, విధుల్లో ఉండగా మరణించిన ముగ్గురు కానిస్టేబుళ్ల వివరాలను ఆసరాగా చేసుకున్నాడు. ప్రభుత్వ చెల్లింపుల వ్యవస్థ అయిన IFMIS (Integrated Financial Management and Information System) పోర్టల్‌లో మరణించిన వారి ఎంప్లాయీ ఐడీలను యాక్టివ్‌గానే ఉంచి, వాటి స్థానంలో ఇతరుల పేర్లను చేర్చాడు. ఆపై ప్రైవేటు బ్యాంకుల్లో నకిలీ ఖాతాలను తెరిచి, తన వ్యక్తిగత మొబైల్ నంబర్లను అనుసంధానించాడు. ఈ విధంగా 2022 నుండి 2026 వరకు అంటే దాదాపు నాలుగు సంవత్సరాల పాటు సుమారు రూ. 1.40 కోట్ల ప్రభుత్వ ధనాన్ని తన సొంత ఖాతాల్లోకి మళ్లించుకున్నాడు.

ఉన్నతాధికారుల పాత్రపై అనుమానాలు

ఒక ప్రభుత్వ ఉద్యోగి మరణించిన తర్వాత వారి ఐడీని తక్షణమే నిలిపివేసి, డ్యూస్ అన్నీ సెటిల్ చేయాలి. అయితే, నాలుగేళ్లుగా నిధులు డ్రా అవుతున్నా ఉన్నతాధికారులు గుర్తించలేకపోవడం వ్యవస్థలోని వైఫల్యాన్ని సూచిస్తోంది. ముఖ్యంగా, పోర్టల్‌లో పేర్లు మార్చాలన్నా లేదా భారీ మొత్తంలో నిధులు విడుదల కావాలన్నా పే-సెక్షన్ అధికారుల డిజిటల్ సంతకాలు లేదా ఖజానా (Treasury) శాఖ లాగిన్ అనుమతులు తప్పనిసరి. కాబట్టి, ఇది కేవలం ఒక్క క్లరికల్ ఉద్యోగి వల్ల సాధ్యమయ్యే పని కాదని, దీని వెనుక పెద్దల హస్తం లేదా పర్యవేక్షణ లోపం స్పష్టంగా కనిపిస్తోందని నిపుణులు అభిప్రాయపడుతున్నారు.

దర్యాప్తు ముమ్మరం – సిట్ రంగంలోకి

ఇటీవల నిర్వహించిన అంతర్గత ఆడిటింగ్‌లో ఈ భారీ గోల్‌మాల్ బయటపడింది. చనిపోయిన వారి పేరుతో ఇంకా జీతాలు జమ అవుతుండటాన్ని చూసి ఉన్నతాధికారులు విస్తుపోయారు. కరీంనగర్ పోలీస్ కమిషనర్ ఆదేశాల మేరకు టూటౌన్ పోలీస్ స్టేషన్‌లో కేసు నమోదవ్వగా, ప్రస్తుతం ఏసీబీ అధికారి రామచందర్రావు ఆధ్వర్యంలో విచారణ కొనసాగుతోంది. నిందితులు ఈ కుంభకోణం కోసం ఎంతమంది ఐడీలను వాడారు? తనిఖీల్లో ఈ విషయం ఎందుకు బయటపడలేదు? అనే కోణంలో ఆరా తీస్తున్నారు. బాధ్యులెవరైనా సరే కఠిన చర్యలు తీసుకుంటామని ప్రభుత్వం హెచ్చరించింది.