కర్ణాటక సీఎంగా రేపు డీకే శివకుమార్ ప్రమాణ స్వీకారం

DK Shivakumar to take oath : కర్ణాటక నూతన ముఖ్యమంత్రిగా డీకే శివకుమార్ ప్రమాణ స్వీకార మహోత్సవానికి సర్వం సిద్ధమైంది. జూన్ 3వ తేదీ (బుధవారం) సాయంత్రం 4:05 గంటలకు కర్ణాటక శాసనసభ (విధాన సౌధ) ప్రాంగణంలో లేదా లోక్ భవన్‌లో ఈ చారిత్రాత్మక కార్యక్రమం జరగనుంది.

ఈ వేడుకకు దేశవ్యాప్తంగా ఉన్న ప్రముఖులు, రాజకీయ నాయకులు, ఎన్నికైన ప్రతినిధులు, పెద్ద సంఖ్యలో ప్రజలు హాజరవుతారని భావిస్తున్నారు. ఈ నేపథ్యంలో భద్రతా ఏర్పాట్లు, ట్రాఫిక్ నియంత్రణ, కార్యక్రమం సజావుగా సాగేలా చూడటం కోసం కర్ణాటక ప్రభుత్వం ఒక కీలక నిర్ణయం తీసుకుంది. జూన్ 3న విధాన సౌధ, వికాస సౌధ, బహుళ అంతస్తుల భవనాలలో పనిచేసే రాష్ట్ర ప్రభుత్వ అధికారులు, సిబ్బందికి అర రోజు (హాఫ్ డే) సెలవు ప్రకటిస్తూ గవర్నర్ పేరు మీద సిబ్బంది, పరిపాలనా సంస్కరణల శాఖ (DPAR) అధికారిక ఉత్తర్వులు జారీ చేసింది.

DK Shivakumar to take oath

DK Shivakumar to take oath : కొత్త మంత్రివర్గ ఏర్పాటుపై కాంగ్రెస్ హైకమాండ్ తీవ్ర కసరత్తు

దీంతో ఈ పరిసరాల్లోని ప్రభుత్వ కార్యాలయాలన్నీ మధ్యాహ్నం నుంచే మూసివేయబడతాయి. మరోవైపు, ప్రమాణ స్వీకారానికి ముందే కర్ణాటకలో కొత్త మంత్రివర్గ ఏర్పాటు, కీలక నియామకాలపై కాంగ్రెస్ హైకమాండ్ తీవ్ర కసరత్తు చేస్తోంది. ఇందులో భాగంగా కాబోయే ముఖ్యమంత్రి డీకే శివకుమార్ జాతీయ రాజధాని న్యూఢిల్లీకి చేరుకుని, కాంగ్రెస్ జాతీయ అధ్యక్షుడు మల్లికార్జున్ ఖర్గే నివాసంలో కీలక భేటీ అయ్యారు. మంత్రి పదవులు, ఉప ముఖ్యమంత్రి పదవి, రాష్ట్ర కాంగ్రెస్ విభాగంలో చేపట్టాల్సిన సంస్థాగత మార్పులపై ఈ సమావేశంలో విస్తృతంగా చర్చించారు. ఈ ఉన్నత స్థాయి చర్చల్లో కర్ణాటక తాత్కాలిక ముఖ్యమంత్రి సిద్దరామయ్య, కాంగ్రెస్ సంస్థాగత ప్రధాన కార్యదర్శి కె.సి. వేణుగోపాల్‌తో పాటు పలువురు సీనియర్ నేతలు పాల్గొన్నారు. నూతన మంత్రివర్గంలో సిద్దరామయ్య పాత్ర ఎలా ఉండబోతుందనే దానిపై రాజకీయ వర్గాల్లో ఆసక్తికర ఊహాగానాలు సాగుతుండగా, కర్ణాటక కాంగ్రెస్ ఎమ్మెల్యే ప్రియాంక్ ఖర్గే కూడా మల్లికార్జున్ ఖర్గేను విడిగా కలిశారు.