తాజా సమాచారం ప్రకారం, కోల్గేట్ (Colgate Price) వివిధ రకాల టూత్‌పేస్ట్ ఉత్పత్తులపై 4 శాతం నుంచి 5 శాతం వరకు ధరలను పెంచింది.

కోల్గేట్ డెంటల్ క్రీమ్ 200 గ్రాముల ప్యాక్ :

ధరల పెంపు వివరాలను పరిశీలిస్తే, కోల్గేట్ డెంటల్ క్రీమ్ 200 గ్రాముల ప్యాక్ ధర రూ. 5 పెరగడంతో ప్రస్తుతం రూ. 135కి చేరింది. అలాగే 100 గ్రాముల ప్యాక్ ధర రూ. 3 పెరిగి రూ. 73 అయింది. అయితే, ఈ 100 గ్రాముల ప్యాక్‌లో సుమారు 10 శాతం అదనపు పరిమాణాన్ని కూడా కంపెనీ జోడించింది. ఇక 200 గ్రాములు మరియు 100 గ్రాముల టూత్‌పేస్ట్‌తో పాటు టూత్‌బ్రష్ ఉండే కాంబో ప్యాక్ ధర రూ. 8 పెరిగి రూ. 208కి చేరింది.

కోల్గేట్ మాక్స్ ఫ్రెష్ బ్లూ 70 గ్రాముల ప్యాక్ ధర రూ. 4 పెరిగి రూ. 83 అయింది. ప్రీమియం సెగ్మెంట్‌లోని ‘కోల్గేట్ విజిబుల్ వైట్ పర్పుల్’ 200 గ్రాముల ప్యాక్పై గరిష్టంగా రూ. 17 వరకు ధర పెరిగి, రూ. 395కి చేరింది. అయితే సామాన్యులకు కొంత ఊరట కలిగించే అంశం ఏమిటంటే, ఈ ధరల పెరుగుదల ప్రధానంగా మధ్య మరియు ప్రీమియం రేంజ్ ఉత్పత్తులపైనే ప్రభావం చూపింది.

ద్రవ్యోల్బణం కారణంగా సామాన్యులపై భారం పడకుండా రూ. 10, రూ. 20 ధర కలిగిన చిన్న ప్యాకెట్ల ధరలలో ఎలాంటి మార్పు చేయలేదని డిస్ట్రిబ్యూటర్లు స్పష్టం చేశారు. మార్కెట్లో కెమికల్ డెరివేటివ్స్, ప్లాస్టిక్స్ మరియు రవాణా ఖర్చులు పెరగడం వల్లనే ఈ సర్దుబాట్లు చేయాల్సి వచ్చిందని కంపెనీ వర్గాలు పేర్కొన్నాయి. మునుముందు ఇతర ఎఫ్‌ఎంసీజీ కంపెనీలు కూడా ఇదే బాట పట్టే అవకాశం ఉందని నిపుణులు అంచనా వేస్తున్నారు.