తెలంగాణ రాజకీయాల్లో ఫోన్ ట్యాపింగ్ వ్యవహారం మరోసారి ప్రకంపనలు సృష్టిస్తోంది. బీఆర్ఎస్ వర్కింగ్ ప్రెసిడెంట్ కేటీఆర్ పంపిన లీగల్ నోటీసులపై కేంద్ర మంత్రి బండి సంజయ్ కుమార్ ఘాటుగా స్పందించారు.
ఫోన్ ట్యాపింగ్ వ్యవహారంలో తనపై వస్తున్న ఆరోపణలను ఖండిస్తూ కేటీఆర్ లీగల్ నోటీసులు పంపగా, బండి సంజయ్ వాటిని లెక్కచేయనని స్పష్టం చేశారు. కేటీఆర్ పంపే నోటీసులు నిజాన్ని ఎప్పటికీ తుడిచిపెట్టలేవని ఆయన వ్యాఖ్యానించారు. 'తాను ఒక్కసారి కూడా ఫోన్లు ట్యాప్ చేయలేదని కేటీఆర్ ఎక్కడా సూటిగా చెప్పలేదు' అని సంజయ్ ఎత్తిచూపారు. మీరు ఎన్ని నోటీసులు పంపినా, లక్షలాది మంది ప్రజల గొంతులు అడిగే ఒకే ఒక్క ప్రశ్న.. 'అసలు ఫోన్లు ఎందుకు ట్యాప్ అయ్యాయి?' అని ఆయన డిమాండ్ చేశారు. ఈ ప్రశ్న చుట్టూనే ఇప్పుడు తెలంగాణ రాజకీయం తిరుగుతోంది.
Janasena: తెలంగాణ మున్సిపల్ ఎన్నికల్లో జనసేన జెండా ఎగురవేస్తాం అంటున్న నటుడు సాగర్
తాను ప్రజా సమస్యల పోరాటంలో భాగంగా తొమ్మిది సార్లు జైలుకు వెళ్లానని, కేటీఆర్ పంపే కాగితపు నోటీసులు తనను భయపెట్టలేవని బండి సంజయ్ సవాల్ విసిరారు. లీగల్ నోటీసుల ద్వారా తెలంగాణ ఆత్మగౌరవాన్ని తిరిగి తీసుకురాలేమని, కేవలం నిజాన్ని బయటపెట్టడం ద్వారా మాత్రమే అది సాధ్యమని ఆయన అభిప్రాయపడ్డారు. రాజకీయ ప్రయోజనాల కోసం ప్రజల గోప్యతను దెబ్బతీసేలా గత ప్రభుత్వం వ్యవహరించిందని ఆయన తీవ్రంగా ఆరోపించారు. ఈ క్రమంలో విడుదల చేసిన వీడియో సందేశం ప్రస్తుతం సోషల్ మీడియాలో వైరల్ అవుతోంది.
ఈ వివాదం కేవలం నోటీసులకే పరిమితం కాకుండా, రాబోయే రోజుల్లో న్యాయపరంగా మరియు రాజకీయంగా మరింత ముదిరే అవకాశం కనిపిస్తోంది. ఫోన్ ట్యాపింగ్ కేసులో ఇప్పటికే కొందరు పోలీస్ అధికారులు అరెస్టవ్వడం, దర్యాప్తు కొనసాగుతుండటంతో బీజేపీ మరియు కాంగ్రెస్ పార్టీలు బీఆర్ఎస్ అగ్రనేతలను టార్గెట్ చేస్తున్నాయి. నిజాన్ని నిరూపించే వరకు తాము వెనక్కి తగ్గేదే లేదని బండి సంజయ్ సంకేతాలిచ్చారు. మరోవైపు, తమపై బురదజల్లుతున్నారంటూ కేటీఆర్ చట్టపరమైన పోరాటానికి సిద్ధమవ్వడం తెలంగాణ రాజకీయాల్లో ఉత్కంఠను పెంచుతోంది.
Read hindi news: hindi.vaartha.com