DU student gang-raped in Lucknow: ఢిల్లీలోని దౌలత్ రామ్ కళాశాలలో పొలిటికల్ సైన్స్ చదువుతున్న ఒక విద్యార్థిని ఈ దారుణానికి బలయ్యింది. మే నెల సెలవుల్లో భాగంగా జౌన్‌పూర్‌లోని తన స్వగ్రామానికి వెళ్లిన ఆమె, మే 15న తిరిగి ఢిల్లీకి బయలుదేరిన క్రమంలో ఈ ఘాతుకం జరిగింది.

రైలు ప్రయాణంలో ఉండగా బాధితురాలు తనకు పూర్వం పరిచయం ఉన్న శివం యాదవ్ (20) అనే యువకుడికి సందేశం పంపింది. ఆ రైలు లక్నోలోని చార్‌బాగ్ రైల్వే స్టేషన్‌కు చేరుకునే సరికి, శివం యాదవ్ తన స్నేహితుడైన సన్నీ యాదవ్ (19)తో కలిసి అక్కడికి వచ్చాడు. ఢిల్లీకి వెళ్లే ముందు లక్నోలో కొంత సమయం గడపాలని, లక్నో చూసి వెళ్లవచ్చని శివం నమ్మబలకడంతో ఆ విద్యార్థిని రైలు దిగింది.

Read Also: New Zealand Road Accident: న్యూజీలాండ్‌లో విషాదం.. రోడ్డు ప్రమాదంలో భారతీయ ఉబెర్ డ్రైవర్ మృతి!

DU student gang-raped in Lucknow

గదిలో బంధించి, మత్తుమందు ఇచ్చి ఘాతుకం

వారి మాటలు నమ్మిన విద్యార్థినిని వారు సుశాంత్ గోల్ఫ్ సిటీ పోలీస్ స్టేషన్ పరిధిలోని ఒక ప్రైవేట్ ఆసుపత్రి సమీపంలో ఉన్న గదికి క్యాబ్‌లో తీసుకువెళ్లారు. అక్కడ ఆమెకు తాగడానికి కోల్డ్ కాఫీ ఇచ్చారు. అది తాగిన వెంటనే ఆమె స్పృహ కోల్పోవడంతో, మే 15, 16 తేదీల రాత్రి ఆమెపై నిందితులు పలుమార్లు లైంగిక దాడికి పాల్పడ్డారు. మే 16న రెండో నిందితుడు ఆమెపై మళ్లీ దాడి చేయగా, ఆ తర్వాత మరో గుర్తుతెలియని మూడో వ్యక్తిని గదిలోకి తీసుకువచ్చారు. ముగ్గురు కలిసి మే 18 వరకు ఆమెను నిర్బంధించి, నిరంతరం అత్యాచారం చేశారు. ఈ విషయం ఎవరికైనా చెబితే చంపేస్తామని తీవ్రంగా బెదిరించారు.

DU student gang-raped in Lucknow: ఢిల్లీ చేరిన బాధితురాలు.. హెల్ప్‌లైన్ ద్వారా వెలుగులోకి..

మే 18న నిందితులు ఆమెను తిరిగి చార్‌బాగ్ స్టేషన్‌లో జనరల్ టికెట్ కొని ప్లాట్‌ఫారమ్‌పై వదిలేశారు. రైలు ఎక్కిన తర్వాత ధైర్యం తెచ్చుకున్న బాధితురాలు, తన కుటుంబ సభ్యులకు సమాచారం అందించి, రైల్వే హెల్ప్‌లైన్ 139ని సంప్రదించింది. దాంతో రైల్వే ప్రొటెక్షన్ ఫోర్స్ (RPF) తక్షణమే అప్రమత్తమైంది. మే 19న ఢిల్లీలోని ఆనంద్ విహార్ స్టేషన్‌కు చేరుకోగానే పోలీసులు ఆమెను సురక్షితంగా రక్షించి, వైద్య పరీక్షల నిమిత్తం హెడ్గేవార్ ఆసుపత్రికి తరలించారు. వైద్య పరీక్షల్లో ఆమెపై లైంగిక దాడి జరిగినట్లు మరియు మత్తుమందు ఇచ్చినట్లు నిర్ధారణ అయ్యింది. బాధితురాలు ఆనంద్ విహార్ రైల్వే పోలీస్ స్టేషన్‌లో ఫిర్యాదు చేయగా, పోలీసులు ప్రాథమిక ఎఫ్‌ఐఆర్ నమోదు చేశారు. ఘటనా స్థలం లక్నో కావడంతో ‘జీరో ఎఫ్‌ఐఆర్’ నిబంధన కింద ఈ కేసును మే 23న లక్నో పోలీసులకు బదిలీ చేశారు. నిందితులపై సామూహిక అత్యాచారం, అక్రమ నిర్బంధం, విషప్రయోగం, మరియు ప్రాణహాని బెదిరింపుల కింద కఠిన సెక్షన్లతో కేసు నమోదైంది. నిందితులను పట్టుకోవడానికి లక్నో పోలీసులు ప్రస్తుతం నాలుగు ప్రత్యేక బృందాలను ఏర్పాటు చేసి దర్యాప్తును ముమ్మరం చేశారు.