Southwest Monsoon : దేశవ్యాప్తంగా రైతాంగంతో పాటు సామాన్య ప్రజలు ఎంతగానో ఎదురుచూస్తున్న నైరుతి రుతుపవనాల (Southwest Monsoon) గమనంలో కీలక కదలిక వచ్చింది.

ఇవి ప్రస్తుతం చురుగ్గా కదులుతూ లక్షద్వీప్ ప్రాంతానికి చేరుకున్నాయని భారత వాతావరణ శాఖ (IMD) అధికారికంగా వెల్లడించింది. ఆగ్నేయ అరేబియా సముద్రంతో పాటు, బంగాళాఖాతంలోని మరిన్ని ప్రాంతాలకు ఇవి వేగంగా విస్తరిస్తున్నాయి. వాతావరణ శాఖ ముందుగా వేసిన అంచనాల ప్రకారం.. ఈ ఏడాది మే 26 నాడే (నాలుగు రోజులు అటుఇటుగా) రుతుపవనాలు కేరళ తీరాన్ని తాకాల్సి ఉంది. అయితే ప్రస్తుత పరిస్థితులను బట్టి చూస్తే, కేరళ ప్రవేశంలో స్వల్ప ఆలస్యం చోటుచేసుకుంటున్నట్లు తెలుస్తోంది. అయినప్పటికీ, వీటి కదలికలు సానుకూలంగానే ఉన్నాయని, త్వరలోనే కేరళ తీరాన్ని తాకేందుకు అనుకూల వాతావరణం ఏర్పడుతోందని ఐఎండీ స్పష్టం చేసింది.

కేరళ ప్రవేశంపై ఉత్కంఠ: తెలుగు రాష్ట్రాలకు ఎప్పుడంటే?

సాధారణంగా ప్రతి ఏటా జూన్ 1వ తేదీ నాటికి నైరుతి రుతుపవనాలు కేరళ తీరాన్ని తాకుతాయి. ఆ తర్వాత అక్కడ నుంచి క్రమంగా ముందుకు సాగుతూ వారం రోజుల్లో, అంటే జూన్ మొదటి లేదా రెండో వారానికల్లా తెలుగు రాష్ట్రాలైన ఆంధ్రప్రదేశ్, తెలంగాణలకు విస్తరిస్తాయి. ఈసారి ముందస్తు ప్రవేశం ఉంటుందని భావించినప్పటికీ, ప్రస్తుత ఆలస్యం కారణంగా సాధారణ సమయానికే ఇవి కేరళను తాకే అవకాశాలు ఎక్కువగా కనిపిస్తున్నాయి. రుతుపవనాల విస్తరణపైనే దేశంలోని వ్యవసాయ రంగం, ఖరీఫ్ సాగు ఆధారపడి ఉండటంతో ఈ అప్‌డేట్ ఎంతో ప్రాధాన్యత సంతరించుకుంది. రాగల రెండు మూడు రోజుల్లో అరేబియా సముద్రంలో ఏర్పడే వాతావరణ మార్పులను బట్టి కేరళ తీరంలో వర్షాలు ప్రారంభమయ్యే తేదీపై ఐఎండీ మరింత స్పష్టత ఇవ్వనుంది.