Lunar Mission : ఆంధ్రప్రదేశ్ ప్రభుత్వ పాఠశాల విద్యార్థులు అంతర్జాతీయ స్థాయిలో తమ ప్రతిభను చాటుకుంటూ రికార్డులు సృష్టిస్తున్నారు. ప్రపంచంలోనే తొలి గ్లోబల్ ఆల్-గర్ల్స్ లూనార్ క్యూబ్శాట్ మిషన్ అయిన 'మిషన్ శక్తిశాట్' (Mission ShakthiSat) ప్రాజెక్ట్కు తూర్పు గోదావరి జిల్లా ధవళేశ్వరం జిల్లా పరిషత్ ఉన్నత పాఠశాల (ZPHS)కు చెందిన విద్యార్థిని కందుల జెస్సీ ఎంపికయ్యారు.
అక్టోబర్ 11న శ్రీహరికోటలోని షార్ (SHAR) కేంద్రం నుంచి ప్రయోగించనున్న ఈ ఉపగ్రహం (శాటిలైట్) డిజైన్ మరియు సాంకేతికత రూపకల్పనలో జెస్సీ ప్రముఖ అంతరిక్ష శాస్త్రవేత్తలతో కలిసి నేరుగా పనిచేయనున్నారు. ఇందుకోసం ఆమెకు ఆగస్టు 23 నుంచి దేశ రాజధాని ఢిల్లీలో ప్రత్యేక అంతరిక్ష శిక్షణను అందించనున్నారు.
ప్రభుత్వ పాఠశాలల సాధికారతకు నిదర్శనం: జెస్సీకి శుభాకాంక్షల వెల్లువ!
ప్రభుత్వ పాఠశాలలో చదువుతున్న ఒక సామాన్య విద్యార్థిని ఇలాంటి గ్లోబల్ స్పేస్ మిషన్కు ఎంపిక కావడం పట్ల రాష్ట్ర విద్యాశాఖ మంత్రి నారా లోకేష్ ప్రత్యేకంగా స్పందిస్తూ ఆనందం వ్యక్తం చేశారు. విద్యా రంగం మరియు మౌలిక సదుపాయాల కల్పనపై ప్రభుత్వం ఎందుకు అంతగా బడ్జెట్ కేటాయించి పెట్టుబడి పెడుతుందో ఇలాంటి గొప్ప విజయాలే నిరూపిస్తాయని ఆయన కొనియాడారు. కందుల జెస్సీ సాధించిన ఈ అరుదైన విజయం ఆంధ్రప్రదేశ్ రంగానికి, ముఖ్యంగా ప్రభుత్వ విద్యా వ్యవస్థకు ఎంతో గర్వకారణమని ప్రశంసించారు. అంతరిక్ష రంగంలో ఏపీ విద్యార్థులు సరికొత్త చరిత్ర సృష్టిస్తున్నారని చెబుతూ, జెస్సీ రాబోయే లూనార్ మిషన్లో అత్యుత్తమ ప్రదర్శన కనబరచాలని ఆకాంక్షించారు.