మధ్యప్రదేశ్‌లోని (Madhya Pradesh) ఇండోర్‌లో దారుణం చోటు చేసుకుంది. ఉన్నత చదువులు చదువుతున్న ఒక ఎంబీఏ (MBA) విద్యార్థిని, తన క్లాస్‌మేట్ చేతిలోనే దారుణ హత్యకు గురైంది.

మంగళవారం బర్త్‌డే పార్టీ కని చెప్పి వెళ్లిన 24 ఏళ్ల యువతి, శుక్రవారం నాడు తన ప్రియుడు పీయూష్ ధనోటియా ఉంటున్న అద్దె గదిలో నగ్నంగా, శవమై తేలడం కలకలం రేపింది.

ఈ దారుణం వెనుక పక్కా పథకం ఉన్నట్లు పోలీసులు అనుమానిస్తున్నారు. యువతి అదృశ్యమైన రోజే ఆమె మొబైల్ ఫోన్ నుంచి కాలేజీ వాట్సాప్ గ్రూపులోకి ఒక అశ్లీల వీడియో అప్‌లోడ్ అయింది. అందులో యువతి ముఖం స్పష్టంగా కనిపిస్తుండగా, నిందితుడు తన ముఖాన్ని ఎమోజీలతో కప్పివేశాడు. ఈ వీడియో చూసి దిగ్భ్రాంతికి గురైన కాలేజీ యాజమాన్యం, వెంటనే దాన్ని తొలగించి ఆమె తండ్రికి సమాచారం అందించింది. అప్పటికే బాధితురాలి ఫోన్ స్విచ్ఛాఫ్ అయి ఉండటంతో కుటుంబ సభ్యులు ఆందోళనతో పోలీసులను ఆశ్రయించారు.

పరారీలో ఉన్న నిందితుడి కోసం పోలీసుల గాలింపు

(Madhya Pradesh) పోలీసుల నిర్లక్ష్యం వల్లే తమ బిడ్డ ప్రాణాలు కోల్పోయిందని బాధితురాలి తండ్రి ఆరోపిస్తున్నారు. బుధవారమే ఫిర్యాదు చేసినా పోలీసులు త్వరగా స్పందించలేదని, ఒక కానిస్టేబుల్ నిందితుడి గది వరకు వెళ్లి తలుపు లాక్ చేసి ఉండటంతో వెనక్కి వచ్చేశారని ఆయన ఆవేదన వ్యక్తం చేశారు. శుక్రవారం నాటికి గది నుంచి తీవ్రమైన దుర్వాసన రావడంతో స్థానికులు ఫిర్యాదు చేయగా, పోలీసులు తలుపులు పగలగొట్టి చూడటంతో దారుణం వెలుగుచూసింది. మృతదేహం పూర్తిగా కుళ్లిపోయిన స్థితిలో ఉండటంతో, తండ్రి తన కూతురిని ఆమె ధరించిన సాక్స్ ఆధారంగా మాత్రమే గుర్తుపట్టగలిగారు.