Deepak Surya Comments: టీమిండియా హెడ్ కోచ్ గౌతమ్ గంభీర్ శారీరక దృఢత్వం, నొప్పిని భరించే అసాధారణ శక్తిపై మాజీ ఐపీఎల్ ఫిజియో దీపక్ సూర్య ఆసక్తికర సంచలన నిజాలను వెల్లడించారు.

గతంలో ఢిల్లీ డెల్ డెవిల్స్ (ప్రస్తుత ఢిల్లీ క్యాపిటల్స్), బీసీసీఐ నేషనల్ క్రికెట్ అకాడమీ (NCA)లో పనిచేసిన ప్రముఖ స్పోర్ట్స్ ఫిజియో దీపక్ సూర్య ఒక ప్రత్యేక ఇంటర్వ్యూలో గంభీర్, సెహ్వాగ్, ధోనిల అంతర్గత విషయాలను పంచుకున్నారు.

Read Also :SRH Vs RCB Match: మ్యాచ్‌పై రూ. 20 కోట్ల బెట్టింగ్ అంచనా!

Former IPL physio Deepak Surya revealed interesting facts about Gambhir’s pain tolerance.

సాధారణంగా గాయపడిన ఆటగాళ్లు ఫిజియో రూమ్‌లో ట్రీట్‌మెంట్ చేసేటప్పుడు నొప్పి భరించలేక ఒత్తిడి తగ్గించమని అడుగుతుంటారు. కానీ గంభీర్ మాత్రం ఎంతటి కఠినమైన థెరపీనైనా మారుమాట్లాడకుండా భరించేవాడని సూర్య తెలిపారు. “ఒకసారి గంభీర్‌కు భుజంలో తీవ్రమైన సమస్య (షోల్డర్ ఇంపింజ్‌మెంట్) వచ్చింది. నొప్పి తీవ్రతకు డాక్టర్లు మెడికల్ ఇంజెక్షన్లు సిఫార్సు చేశారు. కానీ, గంభీర్ మాత్రం సహజసిద్ధంగా వ్యాయామాల ద్వారానే తగ్గించుకుంటా అని పట్టుబట్టాడు. కేవలం ఎక్సర్‌సైజులు చేసి కోలుకోవడమే కాకుండా, మునుపటి కంటే బలమైన త్రోలు విసిరేలా భుజాన్ని సిద్ధం చేసుకున్నాడు” అని సూర్య కొనియాడారు. మైదానంలో సీరియస్‌గా కనిపించే గంభీర్ బయట మాత్రం చాలా సరదాగా ఉంటాడని చెప్పుకొచ్చారు.

డ్రెస్సింగ్ రూమ్ కామెడీ.. సెహ్వాగ్, నెహ్రాల అపార జ్ఞానం

ఇంటర్నేషనల్ క్రికెట్ డ్రెస్సింగ్ రూమ్ వాతావరణం ఎలా ఉంటుందనే దానిపై దీపక్ సూర్య ఆసక్తికర విషయాలు చెప్పారు. "మీరు గనుక ఒకసారి ప్రొఫెషనల్ డ్రెస్సింగ్ రూమ్‌లోకి వెళ్తే.. లైఫ్‌లో మీకు జోకర్లు, కమెడియన్లు అస్సలు అక్కర్లేదనిపిస్తుంది. మన క్రికెటర్ల దగ్గర అన్ని కామెడీ స్టోరీలు, సెన్సాఫ్ హ్యూమర్ ఉంటాయి" అంటూ నవ్వేశారు.

అంతేకాకుండా వీరేంద్ర సెహ్వాగ్, ఆశిష్ నెహ్రా వంటి సీనియర్ ఆటగాళ్లకు మానవ శరీరం, ఫిట్‌నెస్, గాయాల నుంచి కోలుకోవడంపై అపారమైన జ్ఞానం ఉందని కొనియాడారు. సెహ్వాగ్‌కు కెరీర్‌లో ఎన్నో చోట్ల ట్రీట్‌మెంట్ తీసుకోవడం వల్ల బాడీ మెకానిక్స్ బాగా తెలుసని, ఫిజియోలు పొరపాటున తప్పుడు కండరాన్ని నొక్కితే.. కచ్చితమైన రిలీజ్ పాయింట్ ఎక్కడ ఉందో ఆయనే రివర్స్‌లో చెప్పేవాడని గుర్తుచేసుకున్నారు. ఇక ఆశిష్ నెహ్రా అయితే ఒక గాయం కాగానే డే-1 నుంచి కోలుకునే వరకు ఎలాంటి రీహాబ్ ప్రోటోకాల్స్ పాటించాలో ఒక పక్కా టైమ్‌లైన్ రాసి ఇచ్చేసేవాడని ప్రశంసించారు.

Deepak Surya Comments: 15 కోట్ల ప్లేయర్ గాయపడితే.. ఫిజియోపై ఉండే ఒత్తిడి ఇదే!

ఐపీఎల్ లాంటి మెగా టోర్నమెంట్లలో కోట్ల రూపాయల డబ్బు, విపరీతమైన ఒత్తిడి ఉంటాయని, అందువల్ల స్పోర్ట్స్ ఫిజియో జాబ్ చాలా సవాల్‌తో కూడుకున్నదని దీపక్ సూర్య వివరించారు. మైదానంలో 15 నుంచి 20 కోట్ల విలువైన స్టార్ ప్లేయర్ గాయపడినప్పుడు ఫిజియో తీసుకునే ఒక్క చిన్న నిర్ణయం మ్యాచ్ ఫలితాన్ని, అటు ఫ్రాంచైజీ ఆర్థిక పరిస్థితిని, ఇటు ప్లేయర్ కెరీర్‌ను శాసిస్తుందని అన్నారు.

ఒకసారి ఒక ఆటగాడి వేలికి దెబ్బ తగిలి జాయింట్ పక్కకు జరిగినప్పుడు, చుట్టుపక్కల వారు దాన్ని గట్టిగా లాగి సరిచేయమన్నారని, కానీ తనకు ఏదో తేడా కొట్టడంతో స్కానింగ్‌కు పంపామన్నారు. అక్కడ చూస్తే వేలు ఫ్రాక్చర్ అయిందని, ఒకవేళ తాము బలాత్కారంగా వేలును లాగి ఉంటే అది మరింత ముదిరి సర్జరీ వరకు వెళ్లిపోయేదని ఒక ఉదాహరణను పంచుకున్నారు.