ఏపీ ముఖ్యమంత్రి నారా చంద్రబాబు నాయుడు మత్స్యకార కుటుంబాలకు పెద్ద పీట వేస్తూ కీలక నిర్ణయం తీసుకున్నారు. సముద్రంలో చేపల వేట నిషేధ కాలంలో ఉపాధి కోల్పోయే మత్స్యకారులను ఆదుకునేందుకు ప్రభుత్వం సిద్ధమైంది.

సముద్రంలో వేట విరామ సమయంలో మత్స్యకార కుటుంబాలు ఆర్థిక ఇబ్బందులు ఎదుర్కోకుండా ఉండేందుకు ప్రభుత్వం ‘మత్స్యకారుల సేవలో’ పథకాన్ని అమలు చేస్తోంది. ఈ పథకం కింద ఈ నెల 19వ తేదీన మొత్తం రూ. 286 కోట్ల నిధులను ముఖ్యమంత్రి పంపిణీ చేయనున్నారు. అర్హులైన ప్రతి మత్స్యకార కుటుంబం ఖాతాలో రూ. 20,000 చొప్పున ప్రభుత్వం నగదును జమ చేయనుంది. గత ఏడాది సుమారు 1.30 లక్షల కుటుంబాలకు ఈ ఆర్థిక సాయం అందగా, ఈసారి కూడా అంతే స్థాయిలో లబ్ధిదారులకు మేలు చేకూర్చేలా ప్రభుత్వం చర్యలు చేపట్టింది.

Read Also : ఏపీలో నాల్గు రోజులపాటు వర్షాలు - APSDMA

వేట విరామం – చేపల పునరుత్పత్తికి ప్రాధాన్యత

సముద్ర సంపదను కాపాడటంతో పాటు చేపల పునరుత్పత్తికి ఆటంకం కలగకుండా ఉండేందుకు ఏటా ప్రభుత్వం వేట విరామ సమయాన్ని అమలు చేస్తుంది. ఈ ఏడాది ఏప్రిల్ 15 నుంచి జూన్ 14 వరకు అంటే మొత్తం 61 రోజుల పాటు సముద్రంలో వేటపై నిషేధం కొనసాగనుంది. ఈ సమయంలో యాంత్రిక, మోటారు పడవలతో వేట సాగించడం చట్టరీత్యా నేరం. సముద్రంలోని చేపలు గుడ్లు పెట్టి సంఖ్యను పెంచుకునేందుకు ఈ విరామం ఎంతో అవసరం. అయితే ఈ రెండు నెలల పాటు పనులు లేక మత్స్యకారులు ఇబ్బంది పడకుండా ఉండేందుకే ప్రభుత్వం ఈ ఆర్థిక ప్యాకేజీని ప్రకటించింది.