Myanmar Massive Blast : మయన్మార్: ఈశాన్య మయన్మార్‌లోని షాన్ రాష్ట్రం, నమ్‌కమ్ (Namhkam) టౌన్‌షిప్ పరిధిలోని కాంగ్‌టప్ (Kaungtup) గ్రామంలో ఆదివారం మధ్యాహ్నం భారీ పేలుడు సంభవించింది.

మైనింగ్ మరియు క్వారీ పనుల కోసం పేలుడు పదార్థాలను నిల్వ ఉంచిన ఒక భవనంలో జరిగిన ఈ ప్రమాదంలో 55 మందికి పైగా మరణించగా, 70 మందికి పైగా తీవ్రంగా గాయపడ్డారు.

చైనా సరిహద్దుకు కేవలం 3 కిలోమీటర్ల దూరంలో ఉన్న ఈ ప్రాంతం ప్రస్తుతం మయన్మార్ సైనిక ప్రభుత్వానికి వ్యతిరేకంగా పోరాడుతున్న తిరుగుబాటు సంస్థ ‘తాంగ్ నేషనల్ లిబరేషన్ ఆర్మీ’ (TNLA) అధీనంలో ఉంది.

చిన్నారులతో సహా 46 మృతదేహాలు వెలికితీత..

ప్రమాదం జరిగిన వెంటనే రంగంలోకి దిగిన రెస్క్యూ వర్కర్లు, స్వచ్ఛంద సంస్థలు సహాయక చర్యలు ముమ్మరం చేశాయి. ఆదివారం సాయంత్రానికి ఆరుగురు చిన్నారులతో సహా 46 మృతదేహాలను శిథిలాల నుండి వెలికితీసి అంత్యక్రియల నిమిత్తం తరలించినట్లు క్షేత్రస్థాయి సహాయక సిబ్బంది అంతర్జాతీయ వార్తా సంస్థలకు వెల్లడించారు. గాయపడిన సుమారు 74 మందిని చికిత్స కోసం నమ్‌కమ్ టౌన్‌షిప్ ఆసుపత్రికి తరలించారు. వీరిలో పలువురి పరిస్థితి విషమంగా ఉండటంతో మరణాల సంఖ్య మరింత పెరిగే అవకాశం ఉందని సమాచారం.

ఈ పేలుడు ధాటికి ఆ ప్రాంతం మొత్తం దట్టమైన పొగతో నిండిపోయింది. పేలుడు తీవ్రత ఎంత ఎక్కువగా ఉందంటే, ఘటనా స్థలానికి సమీపంలో ఉన్న వందకు పైగా నివాస గృహాలు తీవ్రంగా దెబ్బతిన్నాయి.

Myanmar Massive Blast: తిరుగుబాటు దళం (TNLA) ప్రకటన

ఈ దుర్ఘటనపై ‘తాంగ్ నేషనల్ లిబరేషన్ ఆర్మీ’ (TNLA) తమ టెలిగ్రామ్ ఛానెల్ ద్వారా అధికారిక ప్రకటన విడుదల చేసింది. తమ ఆర్థిక విభాగానికి చెందిన మైనింగ్, క్వారీ పనుల కోసం భవనంలో నిల్వ ఉంచిన జెలిగ్నైట్ (Gelignite) పేలుడు పదార్థాలు ప్రమాదవశాత్తూ పేలడం వల్లే ఈ ఘోరం జరిగిందని ప్రాథమికంగా నిర్ధారించింది. ఈ ప్రమాదంపై సమగ్ర దర్యాప్తు జరుపుతున్నట్లు పేర్కొంది. మైనింగ్ బ్లాస్టింగ్‌లో వాడే జెలిగ్నైట్ పదార్థాన్ని ఎక్కువ కాలం నిల్వ ఉంచినా లేదా సరైన పద్ధతిలో భద్రపరచకపోయినా అది అత్యంత ప్రమాదకరంగా మారుతుందని నిపుణులు చెబుతున్నారు.