Mohsin Khan: ఐపీఎల్ 2026లో భాగంగా లక్నోలోని ఏకనా స్టేడియం వేదికగా జరుగుతున్న మ్యాచ్‌లో కోల్‌కతా నైట్ రైడర్స్ (KKR) పోరాడి గౌరవప్రదమైన స్కోరు సాధించింది.

లక్నో బౌలర్ మొహ్సిన్ ఖాన్ నిప్పులు చెరిగే బౌలింగ్‌తో కేకేఆర్ వెన్నులో వణుకు పుట్టించినా, రింకూ సింగ్ తన అద్భుత బ్యాటింగ్‌తో జట్టును ఆదుకున్నాడు. నిర్ణీత 20 ఓవర్లలో 7 వికెట్ల నష్టానికి కోల్‌కతా 155 పరుగులు చేసింది.

మొహ్సిన్ ఖాన్ పంజా.. కుప్పకూలిన కేకేఆర్ టాప్ ఆర్డర్

టాస్ గెలిచి బౌలింగ్ ఎంచుకున్న లక్నో సూపర్ జెయింట్స్ (LSG)కు బౌలర్ మొహ్సిన్ ఖాన్ అదిరిపోయే ఆరంభాన్ని ఇచ్చాడు. తన స్పెల్‌లో కేవలం 23 పరుగులే ఇచ్చి 5 వికెట్లు పడగొట్టి కేకేఆర్ బ్యాటింగ్ ఆర్డర్‌ను కంపింపజేశాడు. టిమ్ సీఫెర్ట్ (0), అజింక్య రహానే (10), రోవ్‌మన్ పావెల్ (1) వంటి స్టార్లను పెవిలియన్‌కు పంపడంతో కేకేఆర్ ఒక దశలో 93 పరుగులకే 7 వికెట్లు కోల్పోయి పీకల్లోతు కష్టాల్లో పడింది. కామెరాన్ గ్రీన్ (34) కాసేపు ప్రతిఘటించినా మొహ్సిన్ ధాటికి నిలవలేకపోయాడు.

Mohsin Khan: రింకూ సింగ్ ఒంటరి పోరాటం.. 83 పరుగులతో విధ్వంసం

జట్టు మొత్తం విఫలమవుతున్న వేళ రింకూ సింగ్ మరోసారి ఫినిషర్ పాత్రను అద్భుతంగా పోషించాడు. కేవలం 51 బంతుల్లో 7 ఫోర్లు, 5 సిక్సర్లతో 83 పరుగులు చేసి అజేయంగా నిలిచాడు. వికెట్లు పడుతున్నా ఏమాత్రం భయం లేకుండా మైదానం నలుమూలలా షాట్లు బాదుతూ స్కోరు బోర్డును పరుగులు పెట్టించాడు. చివర్లో సునీల్ నరైన్ సహకారంతో కేకేఆర్ జట్టును 150 మార్కును దాటించాడు. లక్నో బౌలర్లలో మొహ్సిన్ ఖాన్ 5 వికెట్లు తీయగా, జార్జ్ లిండేకు ఒక వికెట్ దక్కింది. ప్రస్తుతం లక్నో విజయం సాధించాలంటే 156 పరుగులు చేయాల్సి ఉంది. పిచ్ నెమ్మదిగా ఉన్న నేపథ్యంలో ఈ లక్ష్యాన్ని చేధించడం లక్నోకు సవాల్‌తో కూడుకున్నదే.