ఈ ఏడాది ఖైరతాబాద్‌తో పాటు నాగోల్‌లోనూ అత్యంత భారీ విగ్రహాలను ప్రతిష్ఠించేందుకు నిర్వాహకులు భారీ ఏర్పాట్లు చేస్తున్నారు.

నాగోల్‌లో 72 అడుగుల అష్టసిద్ధి మట్టి మహాగణపతి

నగరంలోని నాగోల్ ప్రాంతంలో తిరంగ్ యూత్ అసోసియేషన్ ఆధ్వర్యంలో పర్యావరణ పరిరక్షణే ధ్యేయంగా ఏకంగా 72 అడుగుల భారీ మట్టి గణపతిని ‘శ్రీ అష్టసిద్ధి మహాగణపతి’గా తీర్చిదిద్దుతున్నారు. ప్లాస్టర్ ఆఫ్ పారిస్ (PoP) రహితంగా, సహజసిద్ధమైన మట్టితో ఇంత భారీ విగ్రహాన్ని రూపొందించడం విశేషం. గత నెల రోజులుగా దాదాపు 21 మందికి పైగా నిపుణులైన కళాకారులు, శిల్పులు నిరంతరం శ్రమిస్తూ ఈ విగ్రహాన్ని రూపొందిస్తున్నారు. మరో 30 రోజుల్లో ఈ విగ్రహ నిర్మాణ పనులు పూర్తి కానున్నాయని, వినాయక చవితి పండుగకు మూడు రోజుల ముందు నుంచే భక్తులకు దర్శన భాగ్యం కల్పిస్తామని నిర్వాహక కమిటీ సభ్యులు తెలిపారు.

Nagole 72 Feet Ganesha: ఖైరతాబాద్‌లో 69 అడుగుల పంచముఖ సంకటహర గణపతి

మరోవైపు, దేశవ్యాప్తంగా ప్రసిద్ధి చెందిన ఖైరతాబాద్ మహాగణపతిని ఈసారి 69 అడుగుల ఎత్తులో ‘శ్రీ పంచముఖ సంకటహర మహా గణపతి’ రూపంలో కొలువుదీరుస్తున్నారు. ఇప్పటికే కర్రలు, ఇనుప చట్రాలు, మట్టితో విగ్రహ రూపకల్పన పనులు ముమ్మరంగా సాగుతున్నాయి. పర్యావరణహిత రంగులతో ఈ విగ్రహాన్ని సర్వాంగ సుందరంగా తీర్చిదిద్దనున్నారు.

భాగ్యనగరంలో పోటీపడి ఏర్పాటు చేస్తున్న ఈ భారీ విగ్రహాలు ఈసారి నవరాత్రుల ఉత్సవాల్లో భక్తులను విశేషంగా ఆకట్టుకోనున్నాయి. నగర నలుమూలల నుంచే కాకుండా తెలుగు రాష్ట్రాల నలుమూలల నుంచి తరలివచ్చే లక్షలాది మంది భక్తుల కోసం ట్రాఫిక్, భద్రతా ఏర్పాట్లను అధికార యంత్రాంగం ముందస్తుగానే సమన్వయం చేసుకుంటోంది

చంద్రగిరిలో ఏనుగుల హల్‌చల్.. రంగంలోకి పవన్ కల్యాణ్