ప్రవేశ పరీక్షకు హాజరుకావాలనుకునే అర్హులైన విద్యార్థులు ఈ నెల 31వ తేదీలోగా తప్పనిసరిగా తమ దరఖాస్తులను సమర్పించాలని జిల్లా విద్యాశాఖ అధికారి (డీఈవో) డి. వాసంతి వెల్లడించారు. గడువు ముగిసిన తర్వాత ఎలాంటి దరఖాస్తులను స్వీకరించే అవకాశం ఉండదని అధికారులు స్పష్టం చేశారు.

తల్లిదండ్రులకు నవోదయ ప్రవేశాలపై పూర్తి అవగాహన :

ఈ నేపథ్యంలో జిల్లాలోని ప్రభుత్వ ప్రాథమిక, ప్రాథమికోన్నత పాఠశాలల ప్రధానోపాధ్యాయులు (హెచ్‌ఎంలు) విద్యార్థులు, వారి తల్లిదండ్రులకు నవోదయ ప్రవేశాలపై పూర్తి అవగాహన కల్పించాలని డీఈవో సూచించారు. అర్హత కలిగిన ప్రతి విద్యార్థి ఈ అవకాశాన్ని వినియోగించుకునేలా ప్రత్యేక చర్యలు తీసుకోవాలని కోరారు.

జవహర్ నవోదయ విద్యాలయాలు గ్రామీణ ప్రాంతాల ప్రతిభావంతులైన విద్యార్థులకు నాణ్యమైన, ఉచిత విద్యను అందిస్తున్నాయి. విద్యతో పాటు వసతి, భోజనం, పాఠ్యపుస్తకాలు, యూనిఫాం వంటి సౌకర్యాలు కూడా ప్రభుత్వమే కల్పిస్తుంది. దీంతో ప్రతి ఏడాది నవోదయ ప్రవేశ పరీక్షకు వేలాది మంది విద్యార్థులు పోటీపడుతుంటారు.

ఆసక్తి ఉన్న విద్యార్థులు అధికారిక నోటిఫికేషన్‌లో పేర్కొన్న అర్హత ప్రమాణాలను పరిశీలించి, అవసరమైన ధ్రువపత్రాలతో గడువు ముగిసేలోపు ఆన్‌లైన్ ద్వారా దరఖాస్తు పూర్తి చేయాలని అధికారులు సూచిస్తున్నారు. చివరి తేదీ సమీపిస్తున్నందున సాంకేతిక సమస్యలు తలెత్తే అవకాశం ఉండటంతో చివరి నిమిషం వరకు వేచి చూడకుండా ముందుగానే దరఖాస్తు చేసుకోవడం మంచిదని సూచించారు.

నవోదయ విద్యాలయంలో ప్రవేశం సాధించడం విద్యార్థుల భవిష్యత్తుకు బలమైన పునాది అవుతుందని విద్యాశాఖ అధికారులు పేర్కొంటున్నారు. అందుకే అర్హులైన ప్రతి విద్యార్థి ఈ అరుదైన అవకాశాన్ని సద్వినియోగం చేసుకోవాలని విజ్ఞప్తి చేస్తున్నారు.

ఆగష్టు నుంచి ఫ్రిజ్, టీవీ, హెయిర్ ఆయిల్ ధరలు పెంపు..!