Chandrababu Naidu: ఆంధ్రప్రదేశ్లో గిరిజన ప్రాంత ప్రజలకు మెరుగైన మరియు నాణ్యమైన వైద్య సేవలను అందించే ఉద్దేశంతో ప్రభుత్వం మరో కీలక ప్రాజెక్టును అందుబాటులోకి తెస్తోంది.
ఇందులో భాగంగా ముఖ్యమంత్రి నారా చంద్రబాబు నాయుడు నేడు అల్లూరి సీతారామరాజు జిల్లాలో పర్యటించనున్నారు. అరకులోయ మండలం గన్నెల గ్రామంలో ‘సంజీవని’ వైద్య ప్రాజెక్టును ఆయన అధికారికంగా ప్రారంభించనున్నారు. ఈ పర్యటనకు సంబంధించి అధికార వర్గాలు అన్ని ఏర్పాట్లను పూర్తి చేశాయి.
సీఎం చంద్రబాబు పర్యటన షెడ్యూల్ మరియు కార్యక్రమాలు
షెడ్యూల్ ప్రకారం.. సీఎం చంద్రబాబు ఉదయం 10 గంటలకు ఉండవల్లి నివాసం నుంచి ప్రత్యేక హెలికాప్టర్లో బయలుదేరి గన్నెల గ్రామానికి చేరుకుంటారు. పర్యటనలో భాగంగా తొలుత రామకృష్ణానగర్లోని ఒక గిరిజన కుటుంబాన్ని పరామర్శించి వారి బాగోగులు తెలుసుకుంటారు. ఆ తర్వాత గన్నెల ప్రాథమిక ఆరోగ్య కేంద్రం (PHC) వద్ద ‘సంజీవని’ ప్రాజెక్టును లాంఛనంగా ప్రారంభిస్తారు.
Chandrababu Naidu: ప్రజావేదిక బహిరంగ సభ మరియు స్టాళ్ల సందర్శన
ప్రాజెక్టు ప్రారంభోత్సవం ముగిసిన వెంటనే గన్నెల గ్రామంలో నిర్వహించనున్న ‘ప్రజావేదిక’ బహిరంగ సభలో ముఖ్యమంత్రి పాల్గొని ప్రజలనుద్దేశించి ప్రసంగించనున్నారు. ఈ సందర్భంగా ప్రభుత్వం అమలు చేస్తున్న వివిధ సంక్షేమ, అభివృద్ధి పథకాలకు సంబంధించిన ప్రదర్శన స్టాళ్లను ఆయన పరిశీలిస్తారు. అలాగే, స్థానిక పార్టీ శ్రేణులు మరియు కార్యకర్తలతోనూ సీఎం ప్రత్యేకంగా సమావేశం కానున్నారు. అన్ని కార్యక్రమాలు ముగిసిన తర్వాత ఆయన హెలికాప్టర్ ద్వారా తిరిగి ఉండవల్లికి పయనం అవుతారు.