నేడు మెడికల్ షాప్స్ బంద్.. ఎందుకంటే !!

ఆన్‌లైన్ మందుల విక్రయాలు, ఈ-ఫార్మసీ కంపెనీల మితిమీరిన డిస్కౌంట్ల విధానానికి వ్యతిరేకంగా ఆలిండియా ఆర్గనైజేషన్ ఆఫ్ కెమిస్ట్స్ అండ్ డ్రగ్గిస్ట్స్ (AIOCD) ఇచ్చిన పిలుపు మేరకు దేశవ్యాప్తంగా నేడు రిటైల్ మెడికల్ షాపులు నిరసన వ్యక్తం చేస్తున్నాయి.

చట్టవిరుద్ధంగా సాగుతున్న ఆన్‌లైన్ ఫార్మసీల వ్యాపారం వల్ల సాధారణ మందుల దుకాణదారులు తీవ్రంగా నష్టపోతున్నారని, కోవిడ్ సమయంలో ఇచ్చిన తాత్కాలిక సడలింపులను ఈ-కంపెనీలు దుర్వినియోగం చేస్తున్నాయని అసోసియేషన్ ఆరోపిస్తోంది. వైద్యుల ప్రిస్క్రిప్షన్ లేకుండా ఆన్‌లైన్‌లో యాంటీబయాటిక్స్, షెడ్యూల్డ్ డ్రగ్స్ విక్రయించడం వల్ల ప్రజారోగ్యం ప్రమాదంలో పడుతోందని, దీనిపై కేంద్ర ప్రభుత్వం తక్షణమే కఠినమైన నిబంధనలు తీసుకురావాలని డిమాండ్ చేస్తూ ఈ దేశవ్యాప్త బంద్‌ను చేపట్టారు.

Medical shops strike

అందుబాటులో అత్యవసర సేవలు.. రోగులకు ఇబ్బంది లేకుండా ఏర్పాట్లు

ఈ నిరసన కారణంగా స్థానిక స్వతంత్ర కెమిస్ట్ షాపులు మూతపడినప్పటికీ, అత్యవసర వైద్య సేవలకు ఎలాంటి ఆటంకం కలగకుండా ప్రత్యామ్నాయ ఏర్పాట్లు అందుబాటులో ఉన్నాయి. అపోలో, మెడ్‌ప్లస్ వంటి ప్రధాన చైన్ ఫార్మసీలతో పాటు ప్రభుత్వ ఆసుపత్రులు, ప్రైవేట్ క్లినిక్‌లకు అనుబంధంగా ఉండే మెడికల్ స్టోర్స్ యథావిధిగా పనిచేస్తున్నాయి. అలాగే సామాన్యులకు తక్కువ ధరకే మందులు అందించే జన ఔషధి కేంద్రాలు, అమృత్ (AMRIT) ఔట్‌లెట్లు తెరిచే ఉంటాయని అధికారులు స్పష్టం చేశారు. రోగులు మరియు వారి కుటుంబ సభ్యులు ఎలాంటి ఆందోళనకు గురికాకుండా, అత్యవసర ఔషధాల కోసం ఈ 24 గంటల సేవలందించే ఫార్మసీలను ఆశ్రయించవచ్చని వైద్య ఆరోగ్య శాఖ సూచించింది.