ఐపీఎల్ 2026 ఏప్రిల్ 25వ తేదీ క్రికెట్ చరిత్రలో ఒక సువర్ణ అధ్యాయంగా నిలిచిపోతుంది. నిన్న జరిగిన రెండు మ్యాచ్‌లలో (RR vs SRH మరియు PBKS vs KKR) కలిపి ఏకంగా 986 పరుగులు నమోదయ్యాయి.

ఒకే రోజులో ఇన్ని పరుగులు రావడం లీగ్ చరిత్రలో ఇదే తొలిసారి. గతంలో 2024 ఏప్రిల్ 27న నమోదైన 899 పరుగుల రికార్డును ఈ మెరుపు ఇన్నింగ్స్‌లు బద్దలు కొట్టాయి. కేవలం పరుగులు మాత్రమే కాకుండా, బ్యాటర్లు ఆకాశమే హద్దుగా చెలరేగిపోతూ నిన్న ఒక్కరోజే 59 సిక్సర్లు బాదారు. ఇది కూడా ఐపీఎల్ చరిత్రలో ఒక రోజులో నమోదైన అత్యధిక సిక్సర్ల రికార్డుగా నిలిచింది.

కెఎల్ రాహుల్ సరికొత్త చరిత్ర.. వైభవ్ మెరుపులు

బ్యాటింగ్ విభాగంలో వ్యక్తిగత రికార్డులు సైతం కనుమరుగయ్యాయి. కింగ్స్ ఎలెవన్ పంజాబ్ కెప్టెన్ కెఎల్ రాహుల్ ఏకంగా 152 పరుగులతో అజేయంగా నిలిచి, ఐపీఎల్ చరిత్రలో అత్యధిక వ్యక్తిగత స్కోరు సాధించిన భారతీయ బ్యాటర్‌గా రికార్డు సృష్టించారు. మరోవైపు, రాజస్థాన్ రాయల్స్ యువ సంచలనం వైభవ్ సూర్యవంశీ కేవలం 36 బంతుల్లోనే సెంచరీ పూర్తి చేసి, టోర్నీ చరిత్రలో మూడో ఫాస్టెస్ట్ సెంచరీని తన పేరిట లిఖించుకున్నారు. ఈ ఇద్దరు బ్యాటర్ల వీరవిహారంతో స్టేడియాలు హోరెత్తిపోయాయి. సిక్సర్ల వర్షంతో బౌలర్లకు ఏం చేయాలో పాలుపోని పరిస్థితి ఎదురైంది.

Read Also : AI : మెట్రో నగరాలకే కాదు.. విజయవాడకు పాకిన ఏఐ విప్లవం

పంజాబ్, హైదరాబాద్ అద్భుత విజయాలు

జట్ల పరంగా చూస్తే, నిన్నటి మ్యాచ్‌లు అసాధ్యమైన రన్ ఛేజ్‌లకు కేరాఫ్ అడ్రస్‌గా నిలిచాయి. కేకేఆర్ నిర్దేశించిన భారీ లక్ష్యాన్ని ఛేదించి పంజాబ్ కింగ్స్ (PBKS) ఐపీఎల్ చరిత్రలోనే అత్యధిక రన్ ఛేజ్ చేసిన జట్టుగా రికార్డు నెలకొల్పింది. అదే సమయంలో, రాజస్థాన్ రాయల్స్ నిర్దేశించిన 228 పరుగుల భారీ లక్ష్యాన్ని సన్‌రైజర్స్ హైదరాబాద్ (SRH) విజయవంతంగా ఛేదించి, లీగ్ చరిత్రలో 4వ అత్యధిక రన్ ఛేజ్‌ను నమోదు చేసింది. ఈ పరిణామాలన్నీ చూస్తుంటే, ఐపీఎల్ 2026 సీజన్ పూర్తిగా బ్యాటర్ల రాజ్యంగా మారిందని స్పష్టమవుతోంది.