సెప్టెంబర్ 24న ప్రపంచవ్యాప్తంగా థియేటర్లలో విడుదలైన ఈ చిత్రానికి ప్రేక్షకుల నుంచి మిశ్రమ స్పందన లభించినప్పటికీ, బాక్సాఫీస్ వద్ద మాత్రం కలెక్షన్ల వర్షం కురిపించింది. ఓవరాల్‌గా ప్రపంచవ్యాప్తంగా రూ. 180 కోట్లకు పైగా గ్రాస్ వసూళ్లను రాబట్టి ట్రేడ్ వర్గాలను ఆశ్చర్యపరిచింది. నాని నటన నెక్స్ట్ లెవెల్‌లో ఉండగా, విలన్ పాత్రలో మోహన్ బాబు నటన ప్రేక్షకులను భయపెట్టేలా సాగింది.

నెట్‌ఫ్లిక్స్‌లో అధికారికంగా డిజిటల్ స్ట్రీమింగ్ షురూ

థియేటర్లలో సంచలనం సృష్టించిన 'ది ప్యారడైజ్' సినిమా ఇప్పుడు డిజిటల్ ఆడియన్స్ ముందుకు వచ్చేసింది. ప్రముఖ ఓటీటీ దిగ్గజం నెట్‌ఫ్లిక్స్ ఈ మూవీ డిజిటల్ స్ట్రీమింగ్ హక్కులను దక్కించుకుంది. ఇచ్చిన మాట ప్రకారమే గురువారం అర్ధరాత్రి నుంచి ఈ సినిమా నెట్‌ఫ్లిక్స్‌లో సక్సెస్‌ఫుల్‌గా స్ట్రీమింగ్ అవుతోంది. తెలుగుతో పాటు తమిళం, హిందీ, కన్నడ, మలయాళం భాషల్లో ఈ చిత్రం అందుబాటులో ఉంది. కాగా, థియేటర్ వెర్షన్‌లో తొలగించిన కొన్ని సీన్లు లేదా అదనపు పాటలను ఓటీటీ వెర్షన్‌లో జోడించారా లేదా అనే ఆసక్తి అభిమానుల్లో నెలకొంది.

The Paradise OTT: భారీ తారాగణం మరియు సాంకేతిక నిపుణుల ప్రతిభ

శ్రీ లక్ష్మీ వెంకటేశ్వర సినిమాస్ (ఎస్ఎల్‌వి సినిమాస్) పతాకంపై సుధాకర్ చెరుకూరి ఈ చిత్రాన్ని అత్యంత ప్రతిష్టాత్మకంగా నిర్మించారు. ఈ చిత్రంలో కయాదు లోహర్ హీరోయిన్‌గా నటించగా, కరుడుగట్టిన విలన్ షికంజా మాలిక్‌ పాత్రలో మోహన్ బాబు అద్భుతంగా నటించారు. అలాగే రాఘవ్ జుయల్ విక్రమ్ మాలిక్‌గా, సోనాలి కులకర్ణి సమ్మక్కగా కీలక పాత్రల్లో కనిపించారు. వీరితో పాటు సంపూర్ణేష్ బాబు, ప్రియదర్శి తదితరులు ముఖ్యమైన పాత్రలు పోషించారు. రాక్‌స్టార్ అనిరుధ్ రవిచందర్ అందించిన సంగీతం ఈ సినిమాకు అదనపు బలంగా నిలిచింది.

1980ల నాటి సికింద్రాబాద్ బ్యాక్‌డ్రాప్‌లో రక్తపాత పోరాటం

'ది ప్యారడైజ్' కథాంశం పూర్తిగా 1980ల కాలం నాటి సికింద్రాబాద్ నేపథ్యంతో సాగుతుంది. సమాజంలో ఎటువంటి గుర్తింపు, కనీస పౌరసత్వ హక్కులు లేని 'సవారీ' అనే సంచార తెగ ప్రజల జీవితాల చుట్టూ ఈ కథ తిరుగుతుంది. ఆ ప్రాంతాన్ని తన గుప్పిట్లో ఉంచుకుని ఆ తెగ ప్రజలను బానిసలుగా చూసే షికంజా మాలిక్ (మోహన్ బాబు), అతని కొడుకు విక్రమ్ మాలిక్ (రాఘవ్ జుయల్) అణచివేతను ఎదుర్కొనే నేపథ్యంలో కథ నడుస్తుంది. ఈ క్రమంలో సమ్మక్క (సోనాలి కులకర్ణి) మరియు ఆమె కొడుకు జడల్ (నాని) తమ జాతి ఆత్మగౌరవం, హక్కుల కోసం చేసే భీకర పోరాటమే ఈ చిత్ర ప్రధాన కథాంశం.