SIR : ఆంధ్రప్రదేశ్ రాష్ట్రంలో నిర్వహిస్తున్న ప్రత్యేకాంశాల పరిశీలన (SIR) ప్రక్రియలో పారదర్శకత పాటించాలని, ఓట్ల తొలగింపు కోసం సిద్ధం చేసిన జాబితాలను అన్ని రాజకీయ పార్టీలకు అందుబాటులో ఉంచాలని వైఎస్సార్సీపీ సీనియర్ నేత, మాజీ మంత్రి పేర్ని నాని డిమాండ్ చేశారు.
ఎన్నికల సంఘం (EC) నిర్వహించిన కీలక సమావేశంలో వైఎస్సార్సీపీ MLC లేళ్ల అప్పిరెడ్డితో కలసి ఆయన పాల్గొన్నారు. ఈ సందర్భంగా మాట్లాడుతూ, రాష్ట్రంలో అన్మ్యాప్డ్ (Unmapped), నాట్ ట్రేస్డ్ (Not Traced) ఓటర్ల జాబితాలను పోలింగ్ బూత్ల వారీగా అన్ని రాజకీయ పార్టీలకు తక్షణమే ఇవ్వాలని విజ్ఞప్తి చేశారు. ప్రతి బూత్ స్థాయిలో పూర్తి వివరాలు అందిస్తేనే వాస్తవ పరిస్థితులు వెలుగులోకి వస్తాయని, అప్పుడే అర్హులైన ఓటర్ల హక్కులకు భంగం కలగకుండా చూసే అవకాశం ఉంటుందని స్పష్టం చేశారు.
అర్హుల ఓట్లను తొలగించవద్దు.. ఒకే బూత్ పరిధిలోనే కుటుంబ సభ్యుల ఓట్లు
ఓటర్ల నమోదు, పరిశీలన ప్రక్రియలో ఎలాంటి తొందరపాటు నిర్ణయాలు తీసుకోకూడదని, క్షేత్రస్థాయిలో సరైన విచారణ జరపకుండా అర్హులైన ఓటర్ల పేర్లను జాబితా నుంచి తొలగించవద్దని ఎన్నికల అధికారులను పేర్ని నాని కోరారు. ఒకే కుటుంబానికి చెందిన సభ్యులు లేదా ఒకే వీధిలోని నివాసితుల ఓట్లు వేర్వేరు పోలింగ్ బూత్లకు మారిపోకుండా, వారందరి ఓట్లు ఒకే బూత్ పరిధిలోనే ఉండేలా నియోజకవర్గాల వారీగా సమగ్రంగా వర్గీకరించాలని సూచించారు. అర్హత కలిగిన ఏ ఒక్క పౌరుడూ ఓటు హక్కును కోల్పోకుండా చూసేందుకు, ఈ ప్రక్రియను పారదర్శకంగా మరియు సమర్థవంతంగా పూర్తి చేయాలని విజ్ఞప్తి చేశారు.