LPG Cylinder : దేశంలో గృహావసరాలకు ఉపయోగించే ఎల్పీజీ (LPG) మరియు పారిశ్రామిక అవసరాలకు వాడే ఎల్ఎన్జీ (LNG) సిలిండర్లపై అదనపు ఫీజులు విధించే దిశగా కేంద్ర ప్రభుత్వం కసరత్తు చేస్తోంది.
ముడి చమురు (Crude Oil) తరహాలోనే అత్యవసర సమయాల్లో నిల్వ చేసుకునేందుకు ‘మల్టీ ఫ్యూయల్ స్ట్రాటజిక్ రిజర్వ్స్’ (అత్యవసర ఇంధన నిల్వలు) ఏర్పాటు చేయాలని కేంద్రం ప్రణాళికలు రచిస్తోంది. ఈ భారీ ప్రాజెక్టుకు అవసరమైన నిధులను సమీకరించడంలో భాగంగానే వినియోగదారులపై అదనపు ఛార్జీలు విధించాలనే ఆలోచనలో ఉన్నట్లు తెలుస్తోంది. ప్రతిపాదిత ప్రతిపాదనల ప్రకారం.. ఎల్పీజీపై కిలోకు రూ. 1.29 మరియు ఎల్ఎన్జీపై స్టాండర్డ్ క్యూబిక్ మీటర్కు రూ. 1.43 చొప్పున సెస్ లేదా ఛార్జ్ వసూలు చేసే అవకాశం ఉంది. ఈ నిర్ణయం అమల్లోకి వస్తే, సాధారణ ఇళ్లలో వాడే 14.2 కేజీల వంటగ్యాస్ సిలిండర్ ధర సుమారు రూ. 18 వరకు పెరిగే అవకాశం ఉందనే వార్త సామాన్యుల్లో ఆందోళన కలిగిస్తోంది.
భారీ వ్యయంతో స్ట్రాటజిక్ రిజర్వ్స్: పెరగనున్న ఆర్థిక భారం
గ్లోబల్ ఇంధన సంక్షోభాలు, యుద్ధాలు లేదా సరఫరా వ్యవస్థల్లో అంతరాయాలు ఏర్పడినప్పుడు దేశీయ అవసరాలకు ఇబ్బంది కలగకుండా ఉండేందుకు ఈ మల్టీ ఫ్యూయల్ స్ట్రాటజిక్ రిజర్వ్ల నిర్మాణం అత్యంత ప్రాధాన్యత సంతరించుకుంది. రాబోయే 10 ఏళ్ల కాలంలో ఈ అత్యవసర నిల్వల మౌలిక సదుపాయాల కల్పన కోసం కేంద్ర ప్రభుత్వం ఏకంగా 42 బిలియన్ డాలర్ల భారాన్ని వెచ్చించాల్సి ఉంటుంది. ఈ వ్యయంలో కొంత భాగాన్ని వినియోగదారుల నుంచి సేకరించే రుసుముల ద్వారా సమకూర్చుకోవాలని భావిస్తోంది. ముడిచమురు భద్రతతో పాటు ఎల్పీజీ, ఎల్ఎన్జీ నిల్వలను పెంచడం వల్ల సుదీర్ఘకాలంలో దేశానికి ఇంధన భద్రత చేకూరినప్పటికీ, తక్షణమే వంటగ్యాస్ సిలిండర్లపై రూ. 18 దాకా అదనపు భారం పడనుండటం గృహ బడ్జెట్లపై ప్రభావం చూపనుంది.