Karnataka : కర్ణాటకలో మానవత్వానికే మచ్చతెచ్చేలా ఒక ఘోర కలియుగ ఘాతుకం వెలుగుచూసింది. కన్నప్రేమను మరిచి, ప్రియుడి మోజులో పడి ఒక తల్లి తన ఐదేళ్ల చిన్నారిని అత్యంత దారుణంగా హత్య చేసిందనే వార్త స్థానికంగా తీవ్ర సంచలనం సృష్టిస్తోంది.

వివరాల్లోకి వెళ్తే… ప్రవీణ్, ప్రియాంక అనే దంపతులకు 2007లో వివాహం కాగా, వారికి 17 సంవత్సరాలు మరియు 5 సంవత్సరాల వయసున్న ఇద్దరు కుమార్తెలు ఉన్నారు. అయితే, కొంతకాలంగా భర్తతో వచ్చిన విభేదాల కారణంగా ప్రియాంక తన భర్తను వదిలేసి, మోహన్ అనే ప్రియుడితో కలిసి జీవిస్తోంది. ఈ క్రమంలో ఆమెతో పాటే ఉంటున్న ఐదేళ్ల చిన్న కుమార్తె ఇటీవల అనుమానాస్పద స్థితిలో మరణించడం పలు అనుమానాలకు తావిచ్చింది.

Read Also : 21 మంది మృతి చెందిన ఢిల్లీ అగ్నిప్రమాదం కేసులో హోటల్ వంటవాడు అరెస్ట్

పోలీసుల దర్యాప్తు.. ప్రియుడి అరెస్ట్, తల్లి పరారీ!

కన్నకూతురి మరణంపై తీవ్ర దిగ్భ్రాంతికి లోనైన తండ్రి ప్రవీణ్, తన భార్య ప్రియాంక తన ప్రియుడు మోహన్‌తో కలిసి ఈ దారుణానికి ఒడిగట్టిందని పోలీసులకు ఫిర్యాదు చేశాడు. తమ వివాహేతర బంధానికి అడ్డొస్తుందనే కారణంతోనే ఆ ఇద్దరూ కలిసి పసిప్రాణాన్ని బలితీసుకున్నారని ఆయన తన ఫిర్యాదులో పేర్కొన్నాడు. ప్రవీణ్ ఇచ్చిన ఫిర్యాదు ఆధారంగా కేసు నమోదు చేసుకున్న పోలీసులు తక్షణమే రంగంలోకి దిగి నిందితుడైన ప్రియుడు మోహన్‌ను అదుపులోకి తీసుకుని అరెస్ట్ చేశారు. కాగా, ఈ ఘాతుకానికి సహకరించిన కన్నతల్లి ప్రియాంక ప్రస్తుతం పోలీసుల భయంతో పరారీలో ఉంది. ఈ దారుణ ఘటనపై పోలీసులు కేసును ముమ్మరంగా దర్యాప్తు చేస్తున్నారు.