Sammakka Saralamma: తెలంగాణ రాష్ట్రంలోని ములుగు జిల్లాలో నిర్వహించే మేడారం మహాజాతర ఆసియాలోనే అతిపెద్ద గిరిజన పండుగగా గుర్తింపు పొందింది. సమ్మక్క-సారలమ్మల జాతరగా ప్రసిద్ధి చెందిన ఈ వేడుకకు దేశం నలుమూలల నుంచి కోట్లాది భక్తులు తరలివస్తారు.

రెండు సంవత్సరాలకు ఒకసారి జరిగే ఈ జాతర గిరిజన సంస్కృతి, సంప్రదాయాలకు ప్రతీకగా నిలుస్తుంది. ప్రకృతి ఆరాధన, అమ్మవార్లపై అపారమైన విశ్వాసమే ఈ జాతర ప్రత్యేకత.

Read also: Road Accident: తెలంగాణలో వేర్వేరు ప్రమాదాల్లో నలుగురు మృతి

Sammakka Saralamma

అమ్మవార్లకు ప్రధాన కానుకగా బెల్లం

మేడారం జాతరలో అమ్మవార్లకు భక్తులు సమర్పించే ప్రధాన కానుక బెల్లం. గిరిజన సంప్రదాయంలో బెల్లాన్ని ప్రకృతి ప్రసాదంగా భావిస్తారు. అందుకే బెల్లాన్ని బంగారంతో సమానంగా చూసి 'నిలువెత్తు బంగారం' అని పిలుస్తారు. తమ కోరికలు నెరవేరితే భక్తులు తమ శరీర బరువుకు సమానంగా బెల్లంతో తులాభారం వేసి అమ్మవార్లకు సమర్పించడం ఆనవాయితీ. ఇది భక్తి, కృతజ్ఞతకు ప్రతీకగా భావిస్తారు.

నైవేద్యం నుంచి ప్రసాదం వరకు బెల్లం ప్రాధాన్యం

సమ్మక్క-సారలమ్మ గద్దెల వద్ద బెల్లం ముక్కలను నైవేద్యంగా సమర్పిస్తారు. అనంతరం అదే బెల్లాన్ని ప్రసాదంగా భక్తులు స్వీకరిస్తారు. ఈ ప్రసాదాన్ని ఇంటికి తీసుకెళ్లి భద్రంగా ఉంచితే శుభం కలుగుతుందని, కుటుంబానికి మేలు జరుగుతుందని నమ్మకం. ప్రకృతితో అనుబంధం, సాదాసీదా జీవన విధానం ప్రతిబింబించే ఈ సంప్రదాయమే మేడారం జాతరను ప్రత్యేకంగా నిలబెడుతోంది.