Kagiso Rabada IPL 2026 : ఇండియన్ ప్రీమియర్ లీగ్ (IPL 2026) క్వాలిఫయర్-1 మ్యాచ్‌లో గుజరాత్ టైటాన్స్ (GT) స్పీడ్‌స్టర్ కాగిసో రబాడ బౌలింగ్‌లో సరికొత్త చరిత్ర సృష్టించాడు.

రాయల్ ఛాలెంజర్స్ బెంగళూరు (RCB)తో జరుగుతున్న అత్యంత కీలకమైన ఈ పోరులో రబాడ తన అద్భుత స్పెల్‌తో లీగ్ చరిత్రలోనే సరికొత్త మైలురాయిని అందుకున్నాడు. ఒకే ఐపీఎల్ సీజన్లలో కేవలం పవర్‌ప్లే (తొలి 6 ఓవర్లలో) అత్యధిక వికెట్లు పడగొట్టిన మొట్టమొదటి బౌలర్‌గా రబాడ రికార్డులకెక్కాడు. ఇన్నింగ్స్ ప్రారంభంలో బౌండరీలతో మంచి జోరు మీదున్న ఆర్సీబీ ఓపెనర్ వెంకటేశ్ అయ్యర్ (19)ను పవర్‌ప్లేలోనే క్లీన్ బౌల్డ్ చేయడం ద్వారా రబాడ ఈ సీజన్ పవర్‌ప్లేలో తన 18వ వికెట్‌ను ఖాతాలో వేసుకున్నాడు. ఈ వికెట్‌తో ఐపీఎల్ చరిత్రలో ఒక సీజన్ పవర్‌ప్లేలో అత్యధిక వికెట్లు తీసిన బౌలర్‌గా నిలిచి, మ్యాచ్‌ను తమ వైపు తిప్పుకున్నాడు.

Read Also : ఐపీఎల్ ప్లేఆఫ్స్‌కు తెరలేచింది.. ఆర్సీబీ-గుజరాత్ అమీతుమీ

మహమ్మద్ షమీ, ట్రెంట్ బౌల్ట్ రికార్డులు బద్దలు.. అగ్రస్థానంలో రబాడ!

ఐపీఎల్ చరిత్రలో పవర్‌ప్లే బౌలింగ్‌కు మారుపేరైన దిగ్గజ బౌలర్ల రికార్డులను రబాడ ఈ ప్రదర్శనతో తిరగరాశాడు. అంతకుముందు 2023 సీజన్‌లో గుజరాత్ టైటాన్స్ తరపునే ఆడిన భారత స్టార్ పేసర్ మహమ్మద్ షమీ పవర్‌ప్లేలో 17 వికెట్లు తీసి టాప్‌లో ఉండగా.. ఇప్పుడు రబాడ ఆ రికార్డును అధిగమించి 18 వికెట్లతో అగ్రస్థానానికి చేరుకున్నాడు. వీరితో పాటు 2013లో ముంబై ఇండియన్స్ తరపున మిచెల్ జాన్సన్ 16 వికెట్లు, 2020 సీజన్‌లో ట్రెంట్ బౌల్ట్ 16 వికెట్లను పవర్‌ప్లేలో సాధించారు. క్వాలిఫయర్-1 లాంటి హై-ప్రెజర్ మ్యాచ్‌లో ఆర్సీబీ ఓపెనింగ్ జోడీని విడదీసి రబాడ సృష్టించిన ఈ సరికొత్త రికార్డు గుజరాత్ టైటాన్స్ జట్టుకు ప్లేఆఫ్స్‌లో భారీ కలిసొచ్చే అంశంగా మారింది.