Telangana Assembly Session : తెలంగాణ శాసనసభ సమావేశాల నిర్వహణకు సంబంధించిన ముహూర్తం ఖరారైంది. సెప్టెంబర్ 7న ఉదయం 10 గంటల నుంచి అసెంబ్లీ సమావేశాలు ప్రారంభం కానున్నట్లు శాసనసభ సెక్రటేరియట్ అధికారికంగా ఉత్తర్వులు జారీ చేసింది.
రాష్ట్రంలో నెలకొన్న పలు ప్రాధాన్య అంశాలు, అభివృద్ధి కార్యక్రమాలు, సంక్షేమ పథకాల అమలు మరియు ప్రజల సమస్యలపై సుదీర్ఘంగా చర్చించేందుకు ఈ సమావేశాలు వేదిక కానున్నాయి. ప్రభుత్వం ఈ అసెంబ్లీ వేదికగా పలు కీలక బిల్లులను ప్రవేశపెట్టి ఆమోదింపజేసుకునే దిశగా చర్యలు వేగవంతం చేస్తుండగా, ప్రతిపక్షాలు కూడా ప్రజా సమస్యల ఆధారంగా ప్రభుత్వాన్ని నిలదీసేందుకు సమాయత్తమవుతున్నాయి.
పోటీ వయసు 21 ఏళ్లకు తగ్గింపు: అసెంబ్లీలో కీలక తీర్మానం?
ఈ అసెంబ్లీ సమావేశాల్లో ఒక ప్రాముఖ్యత కలిగిన తీర్మానాన్ని ఆమోదించేందుకు ప్రభుత్వం యోచిస్తోంది. లోక్సభ మరియు రాష్ట్ర శాసనసభ స్థానాలకు పోటీ చేసే అభ్యర్థుల కనీస వయస్సును ప్రస్తుతం ఉన్న 25 సంవత్సరాల నుంచి 21 సంవత్సరాలకు తగ్గిస్తూ శాసనసభలో ప్రత్యేక తీర్మానం ప్రవేశపెట్టే అవకాశం ఉంది. చట్టసభల్లో యువత భాగస్వామ్యాన్ని పెంపొందించడానికి, నిర్ణయాధికారాల్లో యువ ప్రాతినిధ్యానికి మరింత ఆస్కారం కల్పించేందుకు ఈ నిర్ణయం దోహదపడుతుందని భావిస్తున్నారు. ఈ తీర్మానం గనుక శాసనసభలో ఆమోదం పొందితే, దేశ రాజకీయాల్లో యువ నాయకత్వాన్ని ప్రోత్సహించడంలో తెలంగాణ మరో కొత్త అధ్యాయానికి నాంది పలకనుంది.