ORR Fire Accident: హైదరాబాద్ ఔటర్ రింగ్ రోడ్డు (ORR) పరిధిలో తెల్లవారుజామున ఒక భారీ ప్రమాదం తృటిలో తప్పింది. రంగారెడ్డి జిల్లా అబ్దుల్లాపూర్‌మెట్ మండలం కొహెడ సమీపంలో ఓఆర్‌ఆర్‌ సర్వీస్ రోడ్డుపై ప్రయాణిస్తున్న ఓ ప్రైవేటు ట్రావెల్స్ బస్సులో హఠాత్తుగా భయానక మంటలు చెలరేగాయి.

క్షణాల వ్యవధిలోనే బస్సు పూర్తిగా అగ్నికి ఆహుతై అస్థిపంజరంలా మారింది. అయితే, ప్రమాదాన్ని ముందే గమనించిన బస్సు సిబ్బంది, ప్రయాణికులు సమయస్ఫూర్తితో వ్యవహరించి తక్షణమే అప్రమత్తం కావడంతో ఒక పెద్ద ప్రాణ నష్టం తృటిలో తప్పినట్లయింది.

Read Also :Twisha Sharma Death: ట్విషా శర్మ కేసులో కీలక మలుపు: 'ఆమెకు బైపోలార్ డిజార్డర్ సమస్యలున్నాయి' సీబీఐ విచారణలో భర్త

ఇంజిన్ నుండి పొగలు.. అప్రమత్తమైన డ్రైవర్

పోలీసులు, స్థానికులు తెలిపిన వివరాల ప్రకారం.. సదరు ప్రైవేట్ బస్సు శంషాబాద్‌ రాజీవ్ గాంధీ అంతర్జాతీయ విమానాశ్రయం (RGIA) వైపు నుంచి ఓఆర్‌ఆర్‌ సర్వీస్ రోడ్డు మీదుగా వస్తోంది. కొహెడ సమీపంలోకి రాగానే బస్సు ఇంజిన్ భాగం నుండి ఒక్కసారిగా దట్టమైన పొగలు రావడం ప్రారంభమైంది. ప్రమాదాన్ని ముందుగానే పసిగట్టిన బస్సు డ్రైవర్, క్లీనర్ వెంటనే అప్రమత్తమయ్యారు. డ్రైవర్ సమయస్ఫూర్తితో బస్సును రోడ్డు పక్కనే సురక్షితంగా నిలిపివేయగా, క్లీనర్ మరియు సిబ్బంది లగేజీతో సహా ప్రయాణికులందరినీ తక్షణమే కిందకు దించేశారు.

ORR Fire Accident: అగ్నిగోళంలా మారిన బస్సు.. దర్యాప్తులో పోలీసులు

ORR Service Road Accident

ప్రయాణికులు కిందకు దిగిన కొద్ది నిమిషాల వ్యవధిలోనే మంటలు బస్సు మొత్తం వేగంగా వ్యాపించి, వాహనం అగ్నిగోళంలా మారిపోయింది. సమాచారం అందుకున్న అగ్నిమాపక సిబ్బంది (Fire Department) రెండు ఫైర్ ఇంజిన్లతో తక్షణమే ఘటనా స్థలానికి చేరుకుని మంటలను పూర్తిగా అదుపులోకి తెచ్చారు. ప్రమాద సమయంలో బస్సులో ఎంతమంది ప్రయాణికులు ఉన్నారనేది అధికారికంగా తెలియాల్సి ఉంది. ఇంజిన్‌లో జరిగిన షార్ట్ సర్క్యూట్ (Short Circuit) వల్లే ఈ ప్రమాదం జరిగి ఉండవచ్చని ప్రాథమికంగా భావిస్తున్నారు. అబ్దుల్లాపూర్‌మెట్ పోలీసులు ఈ ఘటనపై కేసు నమోదు చేసి దర్యాప్తు జరుపుతున్నారు.