ఈ హింసాత్మక అల్లర్లలో నలుగురు జైలు గార్డులతో సహా మొత్తం 25 మంది ప్రాణాలు కోల్పోగా, 100 మందికి పైగా తీవ్రంగా గాయపడ్డారు. గత ఐదేళ్ల కాలంలో శ్రీలంక జైళ్ల చరిత్రలోనే జరిగిన అత్యంత ఘోరమైన అల్లర్ల ఘటన ఇదేనని అధికారులు సోమవారం ప్రకటించారు. శ్రీలంక రాజధాని కొలంబోకు ఉత్తర ప్రాంతంలో ఉన్న నెగొంబో ప్రధాన జైలులో ఆదివారం సాయంత్రం ఈ వివాదం మొదలైంది. రెండు శత్రు డ్రగ్స్ ముఠాలకు చెందిన ఖైదీలు ఒకరిపై ఒకరు దాడులు చేసుకోవడంతో జైలు కాంప్లెక్స్ అంతా రణరంగంగా మారింది. ఈ ఘర్షణల్లో ఖైదీలు కత్తులతో పొడుచుకోవడమే కాకుండా, పరిస్థితిని అదుపు చేయడానికి ప్రయత్నించిన నలుగురు జైలు గార్డులను కూడా పొట్టనబెట్టుకున్నారు. కొలంబో ప్రభుత్వ ఆసుపత్రి డైరెక్టర్ పుష్ప గమ్లత్ తెలిపిన వివరాల ప్రకారం, మరణించిన వారి శరీరాలపై బుల్లెట్ గాయాలు, కత్తిపోట్లు మరియు తీవ్రమైన ముష్టిఘాతాల గుర్తులు ఉన్నాయి.

Read Also: Pahalgam Attack: పథకం ప్రకారమే పహల్గామ్ దాడి..ఛార్జ్‌షీట్‌లో హఫీజ్ సయీద్ పేరు

Sri Lankan prison

Sri Lankan prison : పైకప్పు ఎక్కి మహిళా ఖైదీల ఆందోళన

జైలులోని ఒక సెక్షన్‌లో మొదలైన ఈ ఘర్షణలు వేగంగా ఇతర విభాగాలకు కూడా వ్యాపించాయి. ఈ గందరగోళాన్ని ఆసరాగా చేసుకుని పక్కనే ఉన్న మహిళా ఖైదీల బ్యారక్స్‌లోని ఖైదీలు ఆదివారం రాత్రి జైలు పైకప్పుపైకి ఎక్కి తమను తక్షణమే విడుదల చేయాలంటూ నిరసనకు దిగారు. అయితే, ఆందోళనల తీవ్రతకు పైకప్పులో కొంత భాగం ఒక్కసారిగా కూలిపోవడంతో పలువురు మహిళా ఖైదీలు కూడా గాయపడ్డారు. ఆదివారం అర్ధరాత్రికి పరిస్థితి కాస్త అదుపులోకి వచ్చినట్లు అనిపించినా, సోమవారం ఉదయం మళ్లీ ఉద్రిక్తతలు మొదలయ్యాయి. ఖైదీలు జైలు లోపల తిరుగుబాటు చేయడంతో జైలు వెలుపల భారీగా పోలీసు కమాండోలను మోహరించారు. భద్రతా నిఘా కోసం వైమానిక దళానికి చెందిన డ్రోన్‌లు, హెలికాప్టర్‌ను రంగంలోకి దించారు. జైలు లోపల నుంచి నిరంతరాయంగా తుపాకీ కాల్పుల శబ్దాలు వినిపించడంతో వెలుపల ఉన్న ఖైదీల బంధువులు, స్థానికులు తీవ్ర భయాందోళనలకు గురయ్యారు. శ్రీలంక జైళ్లలో అల్లర్లు జరగడం ఇదే మొదటిసారి కాదు. శ్రీలంక దేశవ్యాప్తంగా ఉన్న జైళ్లలో ప్రస్తుతం 41,250 మంది ఖైదీలు ఉన్నారు. ఇది అక్కడి జైళ్ల అసలు సామర్థ్యం కంటే దాదాపు నాలుగు రెట్లు ఎక్కువ. ఈ మితిమీరిన రద్దీ మరియు గ్యాంగ్ వార్లే తాజా రక్తపాతానికి ప్రధాన కారణాలుగా భావిస్తున్నారు.

నేపాల్‌లో 102 కిలోలకు పైగా గంజాయితో భారతీయ వ్యక్తి అరెస్టు