తెలంగాణలో ఓటర్ల జాబితాను సర్వాంగ సుందరంగా, పారదర్శకంగా తీర్చిదిద్దేందుకు కేంద్ర ఎన్నికల సంఘం సిద్దమైంది. ఇందులో భాగంగా చేపట్టబోయే ఓటర్ జాబితా స్పెషల్ ఇంటెన్సివ్ రివిజన్ (SIR) ప్రక్రియ కోసం రాష్ట్రవ్యాప్తంగా పకడ్బందీ ఏర్పాట్లు చేస్తున్నట్లు రాష్ట్ర ప్రధాన ఎన్నికల అధికారి (CEO) సి.

సుదర్శన్ రెడ్డి వెల్లడించారు. రాబోయే జూన్ 25 (June 25) నుంచి ఈ ప్రత్యేక ఓటర్ల సంక్షిప్త సవరణ కార్యక్రమం అధికారికంగా ప్రారంభం కానుందని ఆయన ప్రకటించారు. అర్హులైన ప్రతి ఒక్కరికీ ఓటు హక్కు కల్పించడమే కాకుండా, జాబితాలో ఎలాంటి తప్పులు లేకుండా చేయడమే ఈ ఇంటెన్సివ్ రివిజన్ యొక్క ముఖ్య ఉద్దేశమని సీఈఓ స్పష్టం చేశారు.

Read Also : సీఎం స్థాయి అయినప్పటికీ కమల్ ముందు విజయ్ చిన్నోడే !!

తప్పులు ఉంటే నోటీసులు.. పుట్టిన తేదీ నిర్ధారణ తప్పనిసరి

ఈసారి చేపట్టబోయే స్పెషల్ ఇంటెన్సివ్ రివిజన్ (SIR) డ్రాఫ్ట్ పరిశీలనలో ఓటర్ల వివరాలపై ప్రత్యేక శ్రద్ధ పెట్టనున్నారు. ఓటర్ల జాబితాలో పేర్లు నమోదు కాని వారికి, అలాగే తప్పుడు సమాచారం లేదా ఒకే ఓటరుకు రెండు చోట్ల ఓటు హక్కు ఉన్నట్లు గుర్తిస్తే అటువంటి వారికి ఎన్నికల సంఘం అధికారులు నోటీసులు జారీ చేయనున్నారు. ముఖ్యంగా ఓటర్ల వయస్సు, పుట్టిన తేదీ (Date of Birth) నిర్ధారణపై ఈసారి కఠినంగా వ్యవహరించనున్నారు. ఎవరికైనా పుట్టిన తేదీ విషయంలో తప్పులు ఉన్నా, లేదా కొత్తగా నమోదు చేసుకుంటున్నా.. వయస్సును ధృవీకరించేందుకు నిర్ణీత చట్టబద్ధమైన పత్రాలను (Documents) సమర్పించాల్సి ఉంటుందని సీఈఓ తెలిపారు.

ఈసీ నిర్దేశించిన 12 కేటగిరీల డాక్యుమెంట్లు

ఓటు హక్కు నమోదు మరియు పుట్టిన తేదీ సవరణల ప్రక్రియను సరళతరం చేసేందుకు భారత ఎన్నికల సంఘం (EC) కీలక మార్గదర్శకాలను విడుదల చేసింది. ఓటర్లు తమ పుట్టిన తేదీ లేదా గుర్తింపు నిర్ధారణ కోసం ఈసీ ఆమోదించిన 12 రకాల కేటగిరీలకు చెందిన అధికారిక పత్రాలలో ఏదో ఒకదానిని సమర్పించవచ్చని సుదర్శన్ రెడ్డి స్పష్టం చేశారు. ఇందులో ఆధార్ కార్డ్, పాన్‌కార్డ్, డ్రైవింగ్ లైసెన్స్, పదో తరగతి సర్టిఫికేట్, ఇండియన్ పాస్‌పోర్ట్ వంటి ముఖ్యమైన పత్రాలు ఉంటాయని తెలుస్తోంది. అర్హులైన యువతీ యువకులు, మార్పులు చేర్పులు ఉన్న ఓటర్లు ఈ అవకాశాన్ని ఉపయోగించుకుని జూన్ 25 నుంచి ప్రారంభమయ్యే ఈ ప్రక్రియలో భాగస్వాములు కావాలని ఆయన పిలుపునిచ్చారు.