CNAP: దేశవ్యాప్తంగా మొబైల్ వినియోగదారుల భద్రతను పటిష్టం చేసే దిశగా కేంద్ర టెలికాం శాఖ కీలక నిర్ణయం తీసుకుంది. సైబర్ మోసాలు, నకిలీ కాల్స్‌కు అడ్డుకట్ట వేసేందుకు నూతన కాలర్ ఐడీ వ్యవస్థ అయిన 'కాలింగ్ నేమ్ ప్రెజెంటేషన్' ( Calling Name Presentation - CNAP) సేవలను నవంబర్ 1వ తేదీ నుంచి తప్పనిసరిగా అమలు చేయాలని టెలికాం సర్వీస్ ప్రొవైడర్లను ఆదేశించింది.
దీనికి సంబంధించిన అధికారిక మార్గదర్శకాలను కేంద్ర ప్రభుత్వం టెలికాం ఆపరేటర్లకు జారీ చేసింది.
కాల్ రాగానే స్క్రీన్‌పై అసలు పేరు - థర్డ్ పార్టీ యాప్‌లతో పనిలేదు
ఈ సరికొత్త విధానం అందుబాటులోకి వస్తే.. మొబైల్‌కు ఇన్‌కమింగ్ కాల్ వచ్చిన వెంటనే కాల్ చేస్తున్న వ్యక్తి లేదా సంస్థ అధికారిక పేరు స్క్రీన్‌పై ప్రత్యక్షమవుతుంది. ఇప్పటివరకు వినియోగదారులు కాలర్ పేరును తెలుసుకునేందుకు ట్రూకాలర్ (Truecaller) వంటి థర్డ్ పార్టీ యాప్‌లపై ఆధారపడాల్సి వచ్చేది. అయితే, ఈ కొత్త వ్యవస్థ ద్వారా ఎలాంటి బాహ్య అప్లికేషన్లు ఇన్‌స్టాల్ చేసుకోకుండానే నేరుగా నెట్‌వర్క్ స్థాయిలోనే కాలర్ అసలు పేరు డిస్‌ప్లే అవుతుంది. ఆధునిక 4G, 5G నెట్‌వర్క్‌లను ఉపయోగించే అన్ని స్మార్ట్‌ఫోన్లలో ఈ ఫీచర్ డిఫాల్ట్‌గా పని చేయనుంది.
CNAP: కేవైసీ ఆధారిత డేటాబేస్ - సైబర్ స్కామ్‌లకు పూర్తిస్థాయిలో చెక్
డిజిటల్ యుగంలో అమాయక ప్రజలను బురిడీ కొట్టిస్తున్న స్పామ్ కాల్స్, సైబర్ నేరాలు, ఆర్థిక మోసాలను అరికట్టడమే ఈ సాంకేతికత ప్రధాన ఉద్దేశం
కేవైసీ (KYC) ప్రామాణికత: సిమ్ కార్డు కొనుగోలు సమయంలో వినియోగదారులు సమర్పించిన ఆధార్ లేదా ఇతర అధికారిక గుర్తింపు కార్డుల్లోని అసలు పేరు మాత్రమే డిస్‌ప్లేలో కనిపిస్తుంది. దీంతో పేర్లను తారుమారు చేసే అవకాశం ఉండదు.
ప్రత్యేక డేటాబేస్ ఏర్పాటు: ఈ వ్యవస్థను పకడ్బందీగా అమలు చేసేందుకు టెలికాం ఆపరేటర్లు వినియోగదారుల అసలు పేర్లను వారి మొబైల్ నంబర్లతో సమన్వయం చేస్తూ ప్రత్యేక, సురక్షితమైన డేటాబేస్‌ను సిద్ధం చేయనున్నారు.
స్పష్టమైన గుర్తింపు: తెలియని నంబర్ల నుంచి కాల్స్ వచ్చినప్పుడు అది నమ్మకమైన వ్యక్తా లేక గుర్తుతెలియని కాల్ లేదా మార్కెటింగ్ ఏజెన్సీనా అనేది స్పష్టంగా గుర్తించేందుకు వీలవుతుంది.
Epaper: epaper.vaartha.com