తన తాజా చిత్రం 'మా ఇంటి బంగారం' ఘన విజయం సాధించిన నేపథ్యంలో బుధవారం నిర్వహించిన సక్సెస్ మీట్‌లో సమంత స్వయంగా ఈ విషయాన్ని పంచుకున్నారు. దీంతో గత కొద్ది రోజులుగా ఆమె ప్రెగ్నెన్సీపై సోషల్ మీడియాలో వస్తున్న ఊహాగానాలకు పూర్తి స్థాయిలో తెరపడింది.

‘మా ఇంటి బంగారం’ సక్సెస్ మీట్‌లో శుభవార్త

తన నటనతోనే కాకుండా నిర్మాతగానూ వ్యవహరించిన 'మా ఇంటి బంగారం' సినిమా సక్సెస్ వేడుకల్లో సమంత ఎంతో ఉద్వేగానికి లోనయ్యారు. ఈ సందర్భంగా ఆమె మాట్లాడుతూ.. తన జీవితంలో రాబోతున్న ఈ కొత్త మార్పు పట్ల ఎంతో సంతోషంగా ఉన్నానని, అందుకే కొద్దివారాల పాటు సినిమాలకు కాస్త విరామం ఇచ్చి 'మెటర్నిటీ లీవ్' తీసుకుంటున్నట్లు సామ్ స్పష్టం చేశారు.

ఈ చిత్ర దర్శకురాలు బి.వి. నందినీ రెడ్డి సైతం సమంత ప్రెగ్నెన్సీ వార్తను ధృవీకరించారు. ఒకవైపు సినిమా బాక్సాఫీస్ వద్ద భారీ విజయాన్ని అందుకోవడం, అదే సమయంలో సమంత జీవితంలో ఇంతటి శుభపరిణామం చోటుచేసుకోవడం రెట్టింపు ఆనందాన్ని ఇస్తోందని ఆమె పేర్కొన్నారు. కాగా, ఈ సినిమా విడుదలైన కేవలం 5 రోజుల్లోనే ప్రపంచవ్యాప్తంగా ₹50 కోట్లకు పైగా వసూళ్లు సాధించి దూసుకుపోతోంది.

Samantha: డిసెంబర్‌లో చిన్నారి రాక.. వెల్లువెత్తుతున్న శుభాకాంక్షలు

ఇటీవల జరిగిన 'మా ఇంటి బంగారం' ప్రమోషన్స్, సక్సెస్ ఈవెంట్లలో సమంత బేబీ బంప్‌తో కనిపించడంతో అభిమానుల్లో ఆసక్తి మొదలైంది. ఆమె ప్రస్తుతం గర్భధారణ తొలి దశలో ఉన్నారని, డిసెంబర్ 2026 నాటికి బిడ్డకు జన్మనిచ్చే అవకాశం ఉందని ఆమె సన్నిహిత వర్గాలు వెల్లడించాయి.

గతంలో కొన్ని ఆరోగ్య సమస్యల ఎదుర్కొని, కొన్నాళ్లు విరామం తీసుకున్న సమంత.. 'మా ఇంటి బంగారం' సినిమాతో చాలా పవర్‌ఫుల్ రీయంట్రీ ఇచ్చారు. 39 ఏళ్ల సమంత, ప్రముఖ ఫిల్మ్‌మేకర్ రాజ్ నిడిమోరును డిసెంబర్ 2025లో వివాహం చేసుకున్న సంగతి తెలిసిందే. కెరీర్‌లో మంచి సక్సెస్ చూస్తూ, ఇటు వ్యక్తిగత జీవితంలోనూ మాతృత్వపు అడుగులు వేస్తుండటంతో చిత్ర పరిశ్రమ ప్రముఖులు, అభిమానులు ఆమెకు పెద్ద ఎత్తున శుభాకాంక్షలు తెలుపుతున్నారు.