Sara Tendulkar: క్రికెట్ దిగ్గజం సచిన్ టెండూల్కర్ కుమార్తె సారా టెండూల్కర్ తన వివాహం మరియు కాబోయే భాగస్వామికి ఉండాల్సిన లక్షణాల గురించి కొన్ని ఆసక్తికర విషయాలను పంచుకున్నారు.
తన తల్లిదండ్రులైన సచిన్, అంజలిల మధ్య ఉన్న స్నేహపూర్వక బంధమే తనకు జీవితంలో అత్యుత్తమ ఆదర్శమని ఆమె తెలిపారు. ప్రముఖ ఫ్యాషన్ మ్యాగజైన్ ‘వోగ్ ఇండియా’కు ఇచ్చిన ప్రత్యేక ఇంటర్వ్యూలో ఆమె ఈ అంశాలపై స్పష్టంగా మాట్లాడారు.
భాగస్వామిలో స్నేహాన్ని కోరుకుంటున్న సారా
“మా అమ్మానాన్నలు భార్యాభర్తల కంటే ముందు మంచి స్నేహితులు. వారి మధ్య ఉండే సరదా సంభాషణలను, అన్యోన్యతను నేను నిరంతరం గమనిస్తుంటాను. భవిష్యత్తులో నాకు లభించే భాగస్వామి నుంచి కూడా నేను ఖచ్చితంగా అదే స్నేహాన్ని, పరస్పర గౌరవాన్ని ఆశిస్తున్నాను” అని సారా వివరించారు. వారి మధ్య ఎలాంటి ఆధిపత్య ధోరణి ఉండదని, ఆ స్వచ్ఛమైన బంధమే తనను ఎంతగానో స్ఫూర్తినిస్తుందని ఆమె పేర్కొన్నారు.
Sara Tendulkar: తొందరపాటు నిర్ణయాలకు తావులేదు: జెన్-జీ ఆలోచనలపై స్పష్టత
వివాహం విషయంలో సమాజం లేదా కుటుంబం నుంచి ఎంత ఒత్తిడి ఎదురైనా, తాను మాత్రం తొందరపాటు నిర్ణయాలు తీసుకోనని సారా స్పష్టం చేశారు. భాగస్వామి సరైన వ్యక్తి కాదని భావిస్తే, నిశ్చితార్థం తర్వాత కూడా ఆ బంధం నుంచి బయటపడటానికి నేటి జెన్-జీ యువత వెనుకాడటం లేదని ఆమె అభిప్రాయపడ్డారు. గతరకాలంలో ఇలాంటి ధైర్యమైన నిర్ణయాలు తీసుకోవడానికి ఎంతో సంకోచించేవారని, కానీ నేటి యువత తమ వ్యక్తిగత అభిప్రాయాలను నిర్భయంగా వ్యక్తపరుస్తున్నారని తెలిపారు.
సోదరుడి పెళ్లి ఒక ‘ట్రయల్ రౌండ్’: సింపుల్ వెడ్డింగ్పై మనసు
ఈ ఏడాది ఆరంభంలో తన సోదరుడు అర్జున్ టెండూల్కర్ వివాహం జరిగిందని, ఆ ఈవెంట్ తనకు ఒక ‘ట్రయల్ రౌండ్’లా ఉపయోగపడిందని ఆమె సరదాగా వ్యాఖ్యానించారు. గతంలో తాను ఎంతో అట్టహాసంగా వివాహం చేసుకోవాలని కలలు కన్నప్పటికీ, ప్రస్తుత పరిస్థితుల్లో మాత్రం కొద్దిమంది సన్నిహితుల మధ్య నిరాడంబరంగా పెళ్లి చేసుకోవాలని భావిస్తున్నట్లు వెల్లడించారు. రొమాంటిక్ సోల్మేట్స్పై తనకు పూర్తి నమ్మకం ఉన్నప్పటికీ, తన చిన్ననాటి స్నేహితులే తనకు నిజమైన ఆత్మబంధువులు (సోల్మేట్స్) అని సారా సంతోషంగా చెప్పుకొచ్చారు.