Harish Rao: తెలంగాణలో తలెత్తిన విద్యుత్ కొరత మరియు కరెంట్ కోతల అంశం రాష్ట్ర రాజకీయాల్లో తీవ్ర దుమారం రేపుతోంది. ప్రభుత్వ వైఫల్యాలను కప్పిపుచ్చుకునేందుకు అధికార యంత్రాంగంపై నిందలు మోపుతున్నారని ముఖ్యమంత్రి రేవంత్ రెడ్డిపై బీఆర్ఎస్ సీనియర్ నేత, మాజీ మంత్రి హరీశ్ రావు తీవ్రస్థాయిలో మండిపడ్డారు.
అధికారులు, ప్రజలు కలిసి మీ ఉద్యోగం ఊడగొట్టకుండా జాగ్రత్తగా ఉండాలంటూ సీఎంకు ఘాటుగా హెచ్చరికలు జారీ చేశారు.
ప్రభుత్వ నిర్లక్ష్యమే కొరతకు కారణం – అధికారుల బెదిరింపులపై మండిపాటు
రాష్ట్రంలో నెలకొన్న కరెంట్ కోతలకు ప్రభుత్వ ముందస్తు ప్రణాళికా లోపమే ప్రధాన కారణమని హరీశ్ రావు ఆరోపించారు. కనీస స్థాయిలో బొగ్గు నిల్వలను సిద్ధం చేసుకోవడంలో, విద్యుత్ రంగాన్ని పర్యవేక్షించడంలో ప్రభుత్వం విఫలమైందన్నారు. గత తొమ్మిది నెలలుగా ఎల్‌నినో ప్రభావం ఉంటుందని వాతావరణ శాఖ హెచ్చరిస్తున్నా పట్టించుకోని సర్కార్, ఇప్పుడు కోతలు మొదలయ్యాక అధికారులపై చర్యలు తీసుకుంటామంటూ బెదిరింపులకు దిగడం సరికాదని విమర్శించారు. నిషేధిత భూముల జాబితా వివాదంలోనూ గతంలో ఇలాగే అధికారులను బలిపశువులను చేశారని గుర్తుచేశారు.
Harish Rao: మీ పాలనే పెద్ద విపత్తు – సీఎం వ్యాఖ్యలపై కౌంటర్
ఎల్‌నినో ప్రభావాన్ని కోవిడ్ మహమ్మారితో సీఎం రేవంత్ రెడ్డి పోల్చడంపై హరీశ్ రావు తీవ్రంగా స్పందించారు. వీటన్నింటికంటే ప్రస్తుత మీ కాంగ్రెస్ పాలనే రాష్ట్రానికి ఒక పెద్ద విపత్తుగా మారిందని ఎందుకు గ్రహించడం లేదంటూ ఎద్దేవా చేశారు. అధికారులను ఉద్యోగాల నుంచి తొలగిస్తామని హెచ్చరించే ముందు, పాలకుల వైఫల్యాలను సరిదిద్దుకోవాలని ఆయన హితవు పలికారు.