Nitin Nabin: తెలంగాణలో రాబోయే రోజుల్లో భారతీయ జనతా పార్టీ (బీజేపీ) జెండా ఎగరడం ఖాయమని ఆ పార్టీ జాతీయ నేత నితిన్ నబిన్ ధీమా వ్యక్తం చేశారు. రాష్ట్రంలో అధికారంలోకి రావడమే లక్ష్యంగా క్షేత్రస్థాయిలో నాయకులు, కార్యకర్తలు మరింత పట్టుదలతో పని చేయాలని ఆయన పిలుపునిచ్చారు.
10 జిల్లాల బీజేపీ కార్యాలయాలు ప్రారంభం
ఆదివారం హైదరాబాద్ పర్యటనకు వచ్చిన నితిన్ నబిన్.. శంషాబాద్లో నిర్మించిన రంగారెడ్డి రూరల్ జిల్లా పార్టీ నూతన కార్యాలయాన్ని స్వయంగా ప్రారంభించారు. దీనితో పాటు రాష్ట్రంలోని మరో తొమ్మిది జిల్లాల పార్టీ కార్యాలయాలను ఆయన వర్చువల్ (ఆన్లైన్) పద్ధతిలో ఒకేసారి ప్రారంభించారు. ఈ సందర్భంగా ఆయన మాట్లాడుతూ.. గతంలో పశ్చిమ బెంగాల్లో కమలం పార్టీ ఏ విధంగానైతే అలుపెరగని పోరాటం చేసిందో, అదే తరహా పోరాట పటిమను తెలంగాణలోనూ ప్రదర్శించాల్సిన అవసరం ఉందని శ్రేణులకు దిశానిర్దేశం చేశారు.
Nitin Nabin: కాంగ్రెస్ లబ్ధి పొందింది.. బూత్ స్థాయి నుంచి తిరగబడదాం!
రాష్ట్రంలోని ప్రస్తుత కాంగ్రెస్ సర్కారుపై నితిన్ నబిన్ తీవ్ర విమర్శలు గుప్పించారు. రాష్ట్రంలో అవినీతి, ప్రజా వ్యతిరేక పాలన సాగుతోందని దుయ్యబట్టారు. గత ఎన్నికల్లో బీఆర్ఎస్ ప్రభుత్వాన్ని ఓడించడానికి బీజేపీ క్షేత్రస్థాయిలో తీవ్రంగా పోరాడిందని, అయితే ఆ పరిస్థితులను కాంగ్రెస్ పార్టీ తనకు అనుకూలంగా మార్చుకుని రాజకీయ లబ్ధి పొందిందని ఆయన వ్యాఖ్యానించారు. ఈ కాంగ్రెస్ ప్రభుత్వాన్ని గద్దె దించేందుకు కార్యకర్తలంతా వీధుల్లోకి వచ్చి పోరాడాలని కోరారు.
ప్రతి బూత్ స్థాయి నుంచి పార్టీని పటిష్టం చేయాలని, ప్రతి గల్లీలోనూ ప్రధానమంత్రి నరేంద్ర మోదీ నేతృత్వంలోని కేంద్ర ప్రభుత్వ సంక్షేమ పథకాలను, బీజేపీ సిద్ధాంతాలను ప్రజల్లోకి తీసుకెళ్లాలని సూచించారు. రాష్ట్రం అన్ని రంగాల్లో అభివృద్ధి చెందాలంటే కేంద్రంతో పాటు ఇక్కడ కూడా ‘డబుల్ ఇంజిన్’ ప్రభుత్వం రావాలని స్పష్టం చేశారు.
ఎయిర్పోర్ట్లో ఘన స్వాగతం.. విజయ్ సంకల్ప్ సమ్మేళనం
అంతకుముందు శంషాబాద్ ఎయిర్పోర్ట్కు చేరుకున్న నితిన్ నబిన్కు కేంద్ర మంత్రులు జి. కిషన్ రెడ్డి, బండి సంజయ్ కుమార్, సీనియర్ నేత ఎన్. రాంచందర్ రావు తదితరులు ఘన స్వాగతం పలికారు. అనంతరం నాంపల్లి ఎగ్జిబిషన్ గ్రౌండ్స్లో భారీ ఎత్తున నిర్వహించిన బూత్ అధ్యక్షుల ‘విజయ్ సంకల్ప్ సమ్మేళనం’లో ఆయన ముఖ్య అతిథిగా పాల్గొని ప్రసంగించారు.