అమెరికాకు రాజకీయ, ఆర్థిక ప్రత్యర్థులుగా ఉన్న రష్యా, చైనా, ఇరాన్ వంటి దేశాలతో భారత్ జరిపే ద్వైపాక్షిక చర్చలు, కుదుర్చుకునే ఒప్పందాలను వాషింగ్టన్ నిశితంగా పరిశీలిస్తోంది. భౌగోళిక రాజకీయాల్లో భారత్ కీలక పాత్ర పోషిస్తున్న తరుణంలో, ఈ సదస్సులో వ్యూహాత్మక నిర్ణయాలు గ్లోబల్ పవర్ బ్యాలెన్స్‌ను ప్రభావితం చేసే అవకాశం ఉండటంతో ట్రంప్ యంత్రాంగం అప్రమత్తమైంది.

డీడాలరైజేషన్, టారిఫ్ హెచ్చరికలు: గ్లోబల్ ట్రేడ్‌పై ప్రభావం

ఈ సదస్సులో ప్రధానంగా వినిపిస్తున్న ‘డీడాలరైజేషన్’ (అంతర్జాతీయ వ్యాపారంలో అమెరికన్ డాలర్ వాడకాన్ని తగ్గించడం) అంశంపై అమెరికా తీవ్ర అభ్యంతరం వ్యక్తం చేస్తోంది. డాలర్ ఆధిపత్యానికి గండి కొట్టేలా లేదా అమెరికా ఆర్థిక ప్రయోజనాలకు వ్యతిరేకంగా ఏవైనా నిర్ణయాలు తీసుకుంటే సహించేది లేదని ట్రంప్ ఇప్పటికే స్పష్టమైన హెచ్చరికలు జారీ చేశారు. అలాంటి చర్యలకు పాల్పడే దేశాలపై భారీ టారిఫ్‌లు విధించడంతో పాటు అమెరికా మార్కెట్ యాక్సెస్‌ను నిలిపివేస్తామని స్పష్టం చేశారు. దీంతో ఈ సదస్సులో బ్రిక్స్ దేశాలు తీసుకునే ఆర్థిక, వాణిజ్య నిర్ణయాలు అంతర్జాతీయ స్థాయిలో చర్చనీయాంశంగా మారాయి.