H-1B Visas : అమెరికాలో నివసిస్తున్న భారతీయ ఐటీ నిపుణులు, వారి కుటుంబాలకు మళ్లీ తీవ్రమైన ఆందోళన మొదలైంది. H-1B వీసాదారులపై ఆధారపడిన వారి జీవిత భాగస్వాములు (భార్య/భర్త), 21 ఏళ్లలోపు పిల్లలకు ఇచ్చే H-4 వీసా ఆధారిత Employment Authorization Document (EAD) వర్క్ పర్మిట్లను రద్దు చేయడానికి ట్రంప్ పరిపాలనా యంత్రాంగం సరికొత్త ప్రతిపాదనను సిద్ధం చేసింది.
US డిపార్ట్మెంట్ ఆఫ్ హోమ్ల్యాండ్ సెక్యూరిటీ (DHS) తన రెగ్యులేటరీ ఎజెండాలో ఈ అంశాన్ని చేర్చడంతో, గత పదేళ్లుగా లీగల్గా ఉద్యోగాలు చేసుకుంటున్న లక్షలాది మంది జీవితాలు అనిశ్చితిలో పడ్డాయి. 2014 నుంచి 2017 మధ్య కాలంలో వర్క్ పర్మిట్ పొందిన H-4 వీసాదారుల్లో ఏకంగా 93 శాతం మంది భారతీయులే కాగా, అందులో 94 శాతం మంది మహిళలు కావడం గమనార్హం. ఈ ప్రతిపాదన గనక సంపూర్ణంగా అమల్లోకి వస్తే, అమెరికాలో స్థిరపడిన వేలాది భారతీయ కుటుంబాలు ఆర్థికంగా, సామాజికంగా భారీ దెబ్బ తినే అవకాశముంది.
ఆర్థిక పతనం, మానసిక ఒత్తిడి: ఉపాధి కోల్పోనున్న వేలాది మంది మహిళలు
2015లో ఒబామా పాలనలో ప్రారంభమైన H-4 EAD నిబంధన ద్వారా ఉన్నత చదువులు చదివిన అనేకమంది భారతీయ మహిళలు అమెరికాలో సొంతంగా ఉద్యోగాలు, వ్యాపారాలు చేసుకునే అవకాశం పొందారు. అయితే, ప్రస్తుత ప్రతిపాదన కనుక ఆమోదం పొందితే, వీరంతా ఒక్కసారిగా తమ ఉపాధిని కోల్పోవాల్సి వస్తుంది. గ్రీన్ కార్డ్ (శాశ్వత నివాస హోదా) కోసం దశాబ్దాల తరబడి నిరీక్షిస్తున్న భారతీయ కుటుంబాలకు రెండు ఆదాయాల (Dual Income) ఆసరా ఎంతో కీలకంగా మారింది. ఇప్పుడు రెండవ ఆదాయం ఆగిపోతే ఇళ్ల రుణాలు, పిల్లల చదువులు, ఇతర ఖర్చులతో తీవ్ర ఆర్థిక సంక్షోభం తలెత్తే ప్రమాదం ఉంది. కేవలం ఆర్థిక సమస్యలే కాకుండా, నైపుణ్యం కలిగిన మహిళలు ఇళ్లకే పరిమితం కావడం వల్ల వారిలో మానసిక ఒత్తిడి పెరుగుతుందని నిపుణులు ఆందోళన వ్యక్తం చేస్తున్నారు. ప్రతిపాదన ఇంకా తుది రూపు దాల్చాల్సి ఉన్నప్పటికీ, అమెరికాలోని ఎన్నారై (NRI) వర్గాల్లో ఈ వార్త కలకలం రేపుతోంది.