ఉక్రెయిన్‌పై రష్యా విరుచుకుపాటు.. 90 క్షిపణులు, 600 డ్రోన్లతో దాడి

ఉక్రెయిన్‌పై రష్యా భీకర దాడులు

Russia Ukraine War : రష్యా-ఉక్రెయిన్ యుద్ధం మరోసారి తీవ్రరూపం దాల్చింది. ఉక్రెయిన్ రాజధాని కీవ్‌ను లక్ష్యంగా చేసుకుని రష్యా భారీ స్థాయిలో క్షిపణి, డ్రోన్ దాడులు నిర్వహించింది.

ఈ దాడుల్లో రష్యా తన అత్యంత శక్తివంతమైన 'ఒరెష్నిక్' హైపర్‌సోనిక్ బాలిస్టిక్ క్షిపణిని ఉపయోగించడం ప్రపంచవ్యాప్తంగా ఆందోళనకు దారితీసింది.

90 క్షిపణులు, 600 డ్రోన్లతో దాడి

రష్యా ఒకేసారి సుమారు 90 క్షిపణులు, 600 డ్రోన్లతో ఉక్రెయిన్‌పై విరుచుకుపడినట్లు సమాచారం. ఈ భారీ దాడుల్లో కీవ్ ప్రాంతంలోని బిలా జెర్‌క్వా నగరం తీవ్రంగా దెబ్బతిన్నట్లు ఉక్రెయిన్ అధ్యక్షుడు వొలోదిమిర్ జెలెన్‌స్కీ తెలిపారు. ఈ ఘటనలో ఇద్దరు మరణించగా, 83 మంది వరకు గాయపడినట్లు అధికారులు వెల్లడించారు. అనేక భవనాలు ధ్వంసమయ్యాయి.

ఒరెష్నిక్ క్షిపణి ప్రత్యేకత ఏమిటి?

'ఒరెష్నిక్' రష్యా వద్ద ఉన్న అత్యంత ప్రమాదకరమైన హైపర్‌సోనిక్ బాలిస్టిక్ క్షిపణుల్లో ఒకటి. ఇది శబ్ద వేగాన్ని మించి ప్రయాణించే సామర్థ్యాన్ని కలిగి ఉంది. సాధారణ వార్‌హెడ్స్‌తో పాటు అణ్వస్త్రాలను కూడా మోసుకెళ్లగల సామర్థ్యం దీనికి ఉందని చెబుతున్నారు.

మూడోసారి వినియోగించిన రష్యా

నాలుగేళ్లుగా కొనసాగుతున్న యుద్ధంలో రష్యా ఈ క్షిపణిని ఉపయోగించడం ఇది మూడోసారి మాత్రమే. (Russia Ukraine War) గతంలో 2024 నవంబర్‌లో నీప్రోపై, 2025 జనవరిలో లవీవ్‌పై ఈ క్షిపణిని ప్రయోగించినట్లు సమాచారం. తాజాగా మళ్లీ దీనిని వినియోగించడం ప్రపంచ దేశాల్లో ఆందోళన పెంచుతోంది.