TG Assembly Session : తెలంగాణ శాసనసభ వర్షాకాల సమావేశాల నిర్వహణపై బిజినెస్ అడ్వైజరీ కమిటీ (BAC) కీలక నిర్ణయం తీసుకుంది. అసెంబ్లీ సమావేశాలను వారం రోజుల పాటు నిర్వహించాలని కమిటీ సమావేశంలో తీర్మానించారు.
సభను మరింత కాలం పొడిగించాలా వద్దా అనే అంశంపై పరిస్థితిని బట్టి మరోసారి బిజినెస్ అడ్వైజరీ కమిటీ సమావేశమై నిర్ణయం తీసుకోనున్నట్లు స్పష్టం చేశారు. అయితే, అసెంబ్లీ ప్రాంగణంలో చోటుచేసుకున్న పరిణామాల నేపథ్యంలో ప్రతిపక్ష బిఆర్‌ఎస్ పార్టీ ఈ బిఏసి సమావేశాన్ని బహిష్కరించడం గమనార్హం. ప్రజా సమస్యలపై చర్చించేందుకు సభను ఎక్కువ రోజులు నిర్వహించాలని డిమాండ్ చేస్తూనే బిఆర్‌ఎస్ ఈ నిర్ణయం తీసుకున్నట్లు సమాచారం.
చర్చకు కీలక అంశాల ఆమోదం – బిజెపి సుదీర్ఘ డిమాండ్ల జాబితా
విద్యార్థులకు ఎంతో కీలకమైన ఫీజు రీయింబర్స్మెంట్ అంశంపై అసెంబ్లీలో విస్తృతంగా చర్చించేందుకు బిఏసి ఆమోదం తెలిపింది. మరోవైపు ప్రతిపక్ష బిజెపి నేతలు రాష్ట్రంలోని కీలక సమస్యలపై సభలో చర్చ జరపాలని గట్టిగా పట్టుబట్టారు. వివాదాస్పద అసైన్డ్ భూముల 22A అంశంపై జ్యుడీషియల్ విచారణ జరిపించాలనే ప్రధాన డిమాండ్‌తో పాటు మొత్తం 25 ప్రజా సమస్యలపై అసెంబ్లీ వేదికగా చర్చించాలని బిజెపి ప్రతినిధులు కోరారు. ప్రజా సమస్యలపై ప్రతిపక్షాలు వేసిన ప్రతిపాదనలతో రాబోయే వారం రోజుల పాటు తెలంగాణ శాసనసభ సమావేశాలు తీవ్ర వాడీవేడీగా సాగే సూచనలు కనిపిస్తున్నాయి.