అమెరికాలో గ్రీన్ కార్డ్ (శాశ్వత నివాస హోదా) పొందాలనుకునే వలసదారులపై ట్రంప్ ప్రభుత్వం అత్యంత కఠినమైన నిర్ణయాన్ని తీసుకుంది. యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) విడుదల చేసిన తాజా పాలసీ ప్రకారం..

అమెరికాలో తాత్కాలిక వీసాలపై ఉంటూ గ్రీన్ కార్డ్ కోసం దరఖాస్తు చేసుకునే వారు, ఇకపై దేశం దాటి తమ స్వదేశాలకు వెళ్లి అక్కడ ఉన్న అమెరికన్ కాన్సులేట్ ద్వారానే అప్లికేషన్ ప్రాసెస్ పూర్తి చేయాల్సి ఉంటుంది. గత యాభై ఏళ్లుగా ఉన్న ‘అడ్జస్ట్‌మెంట్ ఆఫ్ స్టేటస్’ (అమెరికాలో ఉంటూనే గ్రీన్ కార్డ్‌కు మారే విధానం) సౌకర్యాన్ని కేవలం కొన్ని “అసాధారణ పరిస్థితుల్లో” మాత్రమే అనుమతిస్తామని, సాధారణంగా దీనిని నిరాకరిస్తామని స్పష్టం చేసింది. నాన్-ఇమ్మిగ్రేషన్ వీసాలైన స్టూడెంట్ వీసాలు, టూరిస్ట్ వీసాలపై వచ్చే వారు తమ గడువు ముగిశాక స్వదేశానికి వెళ్లడమే చట్టం యొక్క అసలు ఉద్దేశమని, అమెరికాలోనే ఉండి గ్రీన్ కార్డ్ సంపాదించడానికి ఇదొక అడ్డదారిగా మారకూడదనే ఈ నిర్ణయం తీసుకున్నట్లు అధికార ప్రతినిధులు వెల్లడించారు.

Read Also : ఇరాన్ వేగంగా ఆయుధ స్థావరాన్ని పునర్నిర్మిస్తోంది: నివేదిక

భారతీయులపై తీవ్ర ప్రభావం మరియు భవిష్యత్తు అనిశ్చితి

ఈ హఠాత్ నిర్ణయం అమెరికాలో స్థిరపడిన వేలాది మంది భారతీయులపై, ముఖ్యంగా ఐటీ నిపుణులు, విద్యార్థులు మరియు అమెరికా పౌరులను వివాహం చేసుకున్న వారిపై కోలుకోలేని దెబ్బ తీయనుంది. అయితే, తాజా మార్గదర్శకాల ప్రకారం H-1B వంటి ‘డ్యూయల్ ఇంటెంట్’ (తాత్కాలికంగా ఉంటూనే శాశ్వత నివాసానికి దరఖాస్తు చేసుకునే వీలున్న) వీసాదారులు, దేశ ఆర్థిక ప్రయోజనాలకు లేదా జాతీయ ప్రయోజనాలకు దోహదపడే ఐటీ పరిశోధకులకు దీని నుంచి కొంత మినహాయింపు లభించే అవకాశం ఉందని అధికారులు సంకేతాలు ఇచ్చారు. అయినప్పటికీ, ఎఫ్‌-1 (స్టూడెంట్), బి-1/బి-2 (టూరిస్ట్) వీసాలపై ఉండి గ్రీన్ కార్డ్ ఆశించే వారు మాత్రం ఖచ్చితంగా స్వదేశానికి తిరిగి వెళ్లాల్సిందే. స్వదేశానికి వెళ్లిన తర్వాత అక్కడ వీసా ఇంటర్వ్యూల బ్యాక్‌లాగ్ మరియు నిబంధనల వల్ల నెలల తరబడి వేచి చూడాల్సి రావడం, లేదా తిరిగి అమెరికాలోకి ప్రవేశించకుండా 3 నుండి 10 ఏళ్ల వరకు నిషేధానికి గురయ్యే ప్రమాదం ఉందంటూ ఇమ్మిగ్రేషన్ నిపుణులు ఆందోళన వ్యక్తం చేస్తున్నారు. చట్టబద్ధంగా అమెరికాలో ఉంటూ ఇల్లు, ఉద్యోగం, కుటుంబాలను ఏర్పాటు చేసుకున్న లక్షలాది మంది జీవితాలను ఈ కొత్త పాలసీ తీవ్రమైన గందరగోళంలోకి నెట్టేసింది.