Varalakshmi Vratham : హిందూ సంప్రదాయంలో అత్యంత పవిత్రమైన, విశేషమైన పండుగలలో వరలక్ష్మి వ్రతం (Varalakshmi Vratham) ఒకటి. శ్రావణ మాసంలో వచ్చే రెండవ శుక్రవారం లేదా పౌర్ణమికి ముందు వచ్చే శుక్రవారం రోజున ఈ వ్రతాన్ని ఆచరించడం హిందూ సంస్కృతిలో అనవాయితీగా వస్తోంది.
అష్టలక్ష్మి రూపాలలో ఒకరైన వరలక్ష్మి దేవిని కొలవడం ద్వారా సకల సంపదలు, అష్ట ఐశ్వర్యాలు సిద్ధిస్తాయని భక్తుల ప్రగాఢ విశ్వాసం.
స్వయంగా పరమేశ్వరుడు పార్వతీదేవికి వివరించినట్లు :
పురాణాల ప్రకారం, ఈ వ్రత విశిష్టతను స్వయంగా పరమేశ్వరుడు పార్వతీదేవికి వివరించినట్లు చెబుతారు. మగధ దేశంలో చారుమతి అనే సద్గుణవతి తన భక్తితో లక్ష్మీదేవి ప్రత్యక్ష కటాక్షాన్ని పొందిందని, అప్పటి నుంచి ఈ వ్రతం భూలోకంలో ప్రాచుర్యంలోకి వచ్చిందని చారుమతి కథ చెబుతోంది. లక్ష్మీదేవికి ఇష్టమైన ఈ వ్రతాన్ని ఆచరించడం వల్ల ఇంటా బయటా సుఖశాంతులు వెల్లివిరుస్తాయని నమ్ముతారు.
ఈ పవిత్ర రోజున ఇళ్లను మామిడి తోరణాలు, పూలతో అత్యంత సుందరంగా అలంకరిస్తారు. ఉదయాన్నే తలస్నానం చేసి, భక్తిశ్రద్ధలతో అమ్మవారిని కలశ రూపంలో ప్రతిష్టించి పూజలు నిర్వహిస్తారు. మహిళలు అమ్మవారికి తొమ్మిది పోగుల పసుపు దారాన్ని పూజలో ఉంచి, తమ చేతికి కట్టుకోవడం ఈ వ్రతంలోని ప్రధాన విశేషం. నిష్టతో అమ్మవారికి నైవేద్యాలు సమర్పించి, వాయినాలు ఇచ్చుకుంటారు.
కేవలం లౌకిక సంపదలే కాకుండా, ఆయురారోగ్యాలు, ఐశ్వర్యం, సంతాన సౌభాగ్యాలను ప్రసాదించే తల్లిగా వరలక్ష్మి దేవిని కొలుస్తారు. ఈ వ్రతం ఆచరించడం వల్ల కుటుంబంలో సానుకూల శక్తి పెరగడంతో పాటు సమాజంలో స్త్రీల పాత్ర, వారి సంస్కృతికి ఉన్న ప్రాధాన్యత మరింత బలపడుతుంది. నేటి ఆధునిక కాలంలోనూ మహిళలు ఎంతో ఉత్సాహంగా ఈ పండుగను జరుపుకుంటూ తమ సంప్రదాయాన్ని సజీవంగా ఉంచుతున్నారు.