Asian Games: ఆసియా క్రీడల్లో భారత్, అఫ్ఘనిస్థాన్ జట్ల మధ్య జరగాల్సిన రెండో క్వార్టర్ ఫైనల్ మ్యాచ్ వర్షం కారణంగా రద్దయింది. దీంతో ఐసీసీ టీ20 ర్యాంకింగ్స్‌లో మెరుగైన స్థానంలో ఉన్న టీమిండియా నేరుగా సెమీఫైనల్స్‌కు అర్హత సాధించింది.
కరోగి స్పోర్ట్స్ పార్క్‌లో ఉదయం నుంచి ఎడతెరిపి లేకుండా వర్షం కురవడంతో కనీసం టాస్ కూడా వేయకుండానే మ్యాచ్‌ను రద్దు చేస్తున్నట్లు అంపైర్లు అధికారికంగా ప్రకటించారు.
India vs Afghanistan match called off due to rain; Team India advances to the semi-finals.
Asian Games: ర్యాంకింగ్స్ ఆధారంగా భారత్, పాక్ ముందంజ
అంతకుముందు ఉదయం 5:30 గంటలకు జరగాల్సిన పాకిస్థాన్-హాంగ్‌కాంగ్ తొలి క్వార్టర్ ఫైనల్ మ్యాచ్ కూడా వర్షం కారణంగానే రద్దయింది. ఆ మ్యాచ్‌లోనూ అధిక ర్యాంకింగ్ ఆధారంగా పాకిస్థాన్ సెమీస్‌కు చేరుకుంది. ఐసీసీ టీ20 ర్యాంకింగ్స్‌లో భారత్ నంబర్ 1 స్థానంలో ఉండగా, అఫ్ఘనిస్థాన్ 10వ స్థానంలో ఉంది. మరోవైపు పాకిస్థాన్ 6వ ర్యాంకులో, హాంగ్‌కాంగ్ 24వ ర్యాంకులో కొనసాగుతున్నాయి. ఈ ఐసీసీ ర్యాంకింగ్స్ నిబంధనల ప్రకారమే భారత్, పాకిస్థాన్ జట్లు సెమీఫైనల్స్‌కు ముందంజ వేశాయి.
సెమీఫైనల్లో శ్రీలంక, నేపాల్ మధ్య జరిగే మూడో క్వార్టర్ ఫైనల్ మ్యాచ్ విజేతతో భారత్ తలపడనుంది. మరో సెమీఫైనల్లో బంగ్లాదేశ్, మలేషియా మధ్య జరిగే నాలుగో క్వార్టర్ ఫైనల్ విజేతతో పాకిస్థాన్ పోటీ పడనుంది. మిగిలిన క్వార్టర్ ఫైనల్ మ్యాచ్‌లు మంగళవారం జరగనుండగా, సెమీఫైనల్ పోరు గురువారం జరగనుంది.