Hot Hot Food Eating : చాలా మందికి వంట చేసిన వెంటనే పొగలు కక్కే వేడి వేడి ఆహారాన్ని లేదా మరిగే టీ, కాఫీలను అలాగే తీసుకోవడం అలవాటుగా ఉంటుంది. అయితే, విపరీతమైన వేడి ఉన్న పదార్థాలను నేరుగా నోట్లో వేసుకోవడం వల్ల శరీర అంతర్గత అవయవాలు తీవ్రంగా దెబ్బతింటాయని మరియు అల్సర్స్ (పుండ్లు) వచ్చే ప్రమాదం ఉందని వైద్య నిపుణులు గట్టిగా హెచ్చరిస్తున్నారు.

ఇందుకు నిదర్శనంగా ఇటీవల చైనాలో ఒక మహిళకు ఎదురైన షాకింగ్ అనుభవమే ఒక పెద్ద ఉదాహరణ. సదరు మహిళ ఆహారం పూర్తిగా చల్లారక ముందే గబగబా తినేసింది. అలా తిన్న కొద్దిసేపటికే ఆమెకు తీవ్రమైన ఛాతీ నొప్పి, గొంతులో విపరీతమైన మంట మొదలైంది. అయితే, ఆ మంట నుండి తక్షణ ఉపశమనం (రిలీఫ్) కోసం ఆమె మరింత తొందరపడి ఫ్రిజ్‌లో ఉన్న ఐస్ వాటర్ తాగింది. దాంతో ఆమె పరిస్థితి మరింత విషమంగా మారి శ్వాస తీసుకోవడం కూడా కష్టమైంది.

Read Also : క్యారెట్ తింటే ఎన్ని లాభాలో తెలిస్తే అస్సలు వదిలిపెట్టారు !!

8 సెంటీమీటర్ల భారీ అల్సర్ - వైద్యుల హెచ్చరికలు మరియు తీసుకోవాల్సిన జాగ్రత్తలు

బాధ భరించలేక ఆ మహిళ వెంటనే ఆసుపత్రికి వెళ్లగా, వైద్యులు ఆమెకు ఎండోస్కోపీ పరీక్షలు నిర్వహించారు. ఈ పరీక్షల్లో ఆమె అన్నవాహిక (Food Pipe) లో ఏకంగా 8 సెంటీమీటర్ల పొడవైన భారీ అల్సర్ ఏర్పడినట్లు గుర్తించి డాక్టర్లు సైతం దిగ్భ్రాంతికి గురయ్యారు. వేడి ఆహారం తిన్న వెంటనే అత్యంత చల్లని ఐస్ వాటర్ తాగడం వల్ల థర్మల్ షాక్ తగిలి అన్నవాహిక కణజాలం తీవ్రంగా దెబ్బతిన్నదని వైద్యులు వివరించారు. సాధారణంగా మన నోరు, గొంతు మరియు అన్నవాహిక గోడలు గరిష్టంగా 50 నుండి 60 డిగ్రీల సెల్సియస్ (50 C – 60 C) కంటే ఎక్కువ ఉన్న వేడిని అస్సలు తట్టుకోలేవు. అంతకు మించిన వేడి పదార్థాలను నిరంతరం తీసుకోవడం వల్ల కణజాలాలు కాలిపోయి, దీర్ఘకాలంలో అవి క్యాన్సర్‌కు కూడా దారితీసే అవకాశం ఉందని నిపుణులు హెచ్చరిస్తున్నారు. కాబట్టి ఎలాంటి ఆహారమైనా కాస్త చల్లారిన తర్వాత, మింగడానికి అనుకూలమైన వేడిలో ఉన్నప్పుడు మాత్రమే తినడం ఆరోగ్యానికి ఎంతో సురక్షితం.