హైదరాబాదులో ఉపాధ్యాయులతో నిర్వహించిన ప్రత్యేక సమావేశంలో ఆయన మాట్లాడుతూ.. ఈ ఐదేళ్ల పదవీ కాలంలో విద్యాశాఖ బాధ్యతలను తానే స్వయంగా చూసుకుంటానని మరోసారి స్పష్టం చేశారు. “నేను ప్రభుత్వ పాఠశాలలోనే చదువుకున్నాను, అక్కడ లభించిన బలమైన పునాదితోనే ఈ రోజు ముఖ్యమంత్రి స్థాయికి చేరుకోగలిగాను. నాకు ఆ సర్కారు బడి పునాది అంతర్జాతీయ స్థాయి ‘హార్వర్డ్ చదువు’తో సమానంగా పనిచేసింది” అని సీఎం గుర్తుచేసుకున్నారు. ప్రత్యేకంగా విద్యాశాఖ మంత్రిని నియమించాలని కొందరు సూచిస్తున్నారని, అయితే ఈ రంగాన్ని పూర్తి స్థాయిలో సంస్కరించి, బాగు చేసిన తర్వాతనే ఆ బాధ్యతల నుంచి వైదొలగాలా అని ఆయన ప్రశ్నించారు. విద్యా వ్యవస్థను బలోపేతం చేసే వరకు తానే స్వయంగా పర్యవేక్షిస్తానని ధీమా వ్యక్తం చేశారు.

ఒకటో తేదీనే జీతాలు – తెలంగాణ మేధావులపై కీలక వ్యాఖ్యలు

గత ప్రభుత్వ పాలనతో పోలిస్తే తమ ప్రభుత్వంలో ఉద్యోగుల సంక్షేమానికి అధిక ప్రాధాన్యత ఇస్తున్నామని సీఎం రేవంత్ రెడ్డి ఉపాధ్యాయులకు వివరించారు. 2023 వరకు ప్రతి నెలా 1వ తేదీన ఉద్యోగులు, ఉపాధ్యాయులకు జీతాలు అందేవా అని ఈ సందర్భంగా ఆయన ప్రశ్నించారు. తమ ప్రభుత్వం అధికారంలోకి వచ్చాక ఆర్థిక క్రమశిక్షణతో ప్రణాళికాబద్ధంగా జీతాలను చెల్లిస్తున్నామని గుర్తుచేశారు. ఇదే క్రమంలో తెలంగాణ మేధావుల గురించి ప్రస్తావిస్తూ.. రాష్ట్రంలో నిజమైన మేధావులు కేకే (కే. కేశవరావు), సురవరం జైపాల్ రెడ్డి మాత్రమేనని సీఎం అభిప్రాయపడ్డారు. ఉపాధ్యాయులు సైతం భావి భారత పౌరులను తీర్చిదిద్దే బాధ్యతను సమర్థవంతంగా నిర్వహిస్తూ, ప్రభుత్వ పాఠశాలల ప్రతిష్టను మరింత పెంచాలని పిలుపునిచ్చారు.

విద్యుత్ ఉద్యోగులకు కోటి రూపాయల బీమా పథకం