విజయ్ ముఖ్యమంత్రిగా బాధ్యతలు చేపట్టిన వెంటనే చేసిన అత్యంత కీలకమైన సంతకం ఉచిత విద్యుత్ పథకంపైనే. రాష్ట్రంలోని సామాన్యులు, పేద వర్గాలకు విద్యుత్ భారత్ నుంచి విముక్తి కల్పిస్తూ 200 యూనిట్ల వరకు ఉచిత విద్యుత్ అందిస్తామని ఆయన ప్రకటించారు.

ఈ నిర్ణయం ద్వారా లక్షలాది కుటుంబాలకు ఆర్థికంగా పెద్ద ఊరట కలగనుంది. ఎన్నికల మేనిఫెస్టోలో ఇచ్చిన ప్రధాన హామీని మొదటి రోజే అమలులోకి తీసుకురావడం ద్వారా, తన ప్రభుత్వం ‘ప్రజా సంక్షేమమే పరమావధి’గా పనిచేస్తుందని విజయ్ స్పష్టం చేశారు.

డ్రగ్స్ రహిత సమాజం మరియు మహిళా భద్రతకు పెద్దపీట

రాష్ట్రంలో పెరుగుతున్న డ్రగ్స్ మహమ్మారిని అంతం చేసేందుకు విజయ్ యుద్ధం ప్రకటించారు. డ్రగ్స్ నిరోధక స్పెషల్ టీమ్ (Anti-Drug Special Team) ఏర్పాటు చేస్తూ సంబంధిత ఫైలుపై సంతకం చేశారు. “ఈ రోజు నుంచే మా పోరాటం మొదలవుతుంది” అని ఆయన గట్టి హెచ్చరిక జారీ చేశారు. దీంతో పాటు, మహిళల రక్షణ కోసం ప్రత్యేకంగా ‘స్పెషల్ ఫోర్స్’ను ఏర్పాటు చేస్తున్నట్లు వెల్లడించారు. మహిళలకు పూర్తి స్థాయిలో భద్రత కల్పించడం మరియు నేరగాళ్లలో వణుకు పుట్టించడమే ఈ దళం యొక్క ప్రధాన ఉద్దేశమని ఆయన పేర్కొన్నారు. ఈ రెండు నిర్ణయాలు తమిళనాడులో శాంతిభద్రతల పరిరక్షణపై ఆయనకున్న చిత్తశుద్ధిని చాటుతున్నాయి.

ఖజానా ఖాళీ.. ఆర్థిక పరిస్థితిపై ‘వైట్ పేపర్’

రాష్ట్ర ఆర్థిక పరిస్థితిపై విజయ్ కీలక వ్యాఖ్యలు చేశారు. గత ప్రభుత్వాల హయాంలో ఖజానా ఖాళీ అయిందని, రాష్ట్రం భారీ అప్పుల ఊబిలో ఉందని ఆయన ఆవేదన వ్యక్తం చేశారు. ప్రస్తుత ఆర్థిక స్థితిగతులపై ప్రజలకు స్పష్టతనిచ్చేందుకు త్వరలోనే ‘వైట్ పేపర్’ (శ్వేతపత్రం) విడుదల చేస్తామని ప్రకటించారు. పారదర్శకమైన పాలన అందించడంలో భాగంగా రాష్ట్ర ఆదాయం, ఖర్చులు మరియు అప్పుల వివరాలను ప్రజల ముందు ఉంచుతామని ఆయన వెల్లడించారు. ఆర్థిక సవాళ్లు ఉన్నప్పటికీ, సంక్షేమ పథకాలు ఆగిపోకుండా ప్రత్యామ్నాయ మార్గాల ద్వారా రాష్ట్రాన్ని అభివృద్ధి పథంలో నడిపిస్తానని ఆయన భరోసా ఇచ్చారు.