YSRCP Leaders: నెల్లూరు సెంట్రల్ జైల్లో రిమాండ్ ఖైదీలుగా ఉన్న మాజీ ఎమ్మెల్యే పిన్నెల్లి రామకృష్ణారెడ్డి, ఆయన సోదరుడు పిన్నెల్లి వెంకట్రామిరెడ్డిలను వైసీపీ ముఖ్య నేతలు సోమవారం పరామర్శించారు.

మాజీ మంత్రి విడదల రజని, ఎమ్మెల్సీ పర్వతరెడ్డి చంద్రశేఖర్ రెడ్డి, రాష్ట్ర మహిళా వర్కింగ్ ప్రెసిడెంట్ కాకాణి పూజిత ములాఖత్ ద్వారా వారిని కలిసి ధైర్యం చెప్పారు.

అక్రమ కేసులకు భయపడే ప్రసక్తే లేదు

జైలు వెలుపల నేతలు మాట్లాడుతూ.. పిన్నెల్లి సోదరులు ఎంతో ధైర్యంగా ఉన్నారని వెల్లడించారు. కూటమి ప్రభుత్వం రాజకీయ కక్షతో ఎన్ని అక్రమ కేసులు పెట్టినా, వైసీపీ నాయకులు ఎవరూ భయపడే ప్రసక్తే లేదని వారు స్పష్టం చేశారు. ప్రభుత్వం వైఖరిని ప్రజలందరూ గమనిస్తున్నారని, అక్రమ కేసులు పెట్టడం నియంతృత్వ పోకడలకు నిదర్శనమని విమర్శించారు.

YSRCP Leaders: అధికారులకు, నేతలకు శిక్ష తప్పదు

నేడు అక్రమ కేసులు పెట్టి వేధిస్తున్న నాయకులకు, ప్రభుత్వానికి అనుకూలంగా వ్యవహరిస్తున్న అధికారులకు భవిష్యత్తులో చట్టపరమైన శిక్షలు తప్పవని నేతలు హెచ్చరించారు. 'రేపటి రోజున మా ప్రభుత్వం వస్తుంది.. అప్పుడు ఈ దుర్మార్గపు పాలనకు బాధ్యులైన వారు సమాధానం చెప్పుకోవాల్సి ఉంటుంది' అని వారు వ్యాఖ్యానించారు.

రాష్ట్రంలో ఎన్నడూ లేని విధంగా అక్రమ కేసులు

ప్రస్తుత కూటమి ప్రభుత్వ పాలనలో ఇళ్లపై విధ్వంసం, అక్రమ కేసులు తప్ప అభివృద్ధి లేదని విడదల రజని విమర్శించారు. ప్రజాస్వామ్యంలో ఇలాంటి దుర్మార్గపు పాలనను ఎప్పుడూ చూడలేదని, ప్రభుత్వం పెడుతున్న తప్పుడు కేసుల వల్ల వందలాది మంది నేతలు నిత్యం జైళ్ల చుట్టూ తిరగాల్సి వస్తోందని ఆవేదన వ్యక్తం చేశారు.