పశ్చిమాసియా సంక్షోభాన్ని ఎదుర్కొనేందుకు దేశ ప్రజలకు పొదుపు సలహాలు ఇచ్చిన ప్రధాని నరేంద్ర మోదీ.. తను మాత్రం మరోసారి విదేశీ పర్యటనకు బయలుదేరడం చర్చనీయాంశమైంది.

విదేశీ పర్యటనలు మానుకోవాలంటూ ఓ వైపు దేశ ప్రజలకు పొదుపు ప్రవచనాలు చెప్పి..మోదీ మాత్రం పాటించకపోవడాన్ని ఎలా అర్ధం చేసుకోవాలంటూ సామాన్యులు ప్రశ్నిస్తున్నారు.

పశ్చిమాసియా యుద్దంతో దేశం ఆర్థిక సంక్షోభాన్ని ఎదుర్కొంటుందని..విదేశీ మారక నిల్వల పరిరక్షణకు ఇంధన పొదుపు చేయాలని, బంగారం కొనుగోలు చేయవద్దని, విదేశీ పర్యటనలు నిలిపేసుకోవాలని దేశ ప్రజలకు సలహాలు ఇచ్చిన ప్రధాని నరేంద్ర మోదీ.. తను మాత్రం మరోసారి విదేశీ పర్యటనకు బయలుదేరడం చర్చనీయాంశమైంది. మే 15 నుంచి మే 20 వరకు ఆరు రోజుల పాటు ఐదు దేశాలు యూఏఈ, నెదర్లాండ్స్, స్వీడన్, నార్వే, ఇటలీ దేశాల పర్యటనకు మోదీ బయలుదేరారు.

ఇంధనం, రక్షణ, వాణిజ్యం, సాంకేతికత రంగాల్లో సహకారాన్ని పెంపొందించడమే లక్ష్యంగా మోదీ విదేశీ పర్యటన కొనసాగుతుందని, మొదట యూఏఈని సందర్శించి, అధ్యక్షుడు షేక్ మహమ్మద్ బిన్ జాయెద్ అల్ నహ్యాన్‌తో ద్వైపాక్షిక చర్చలు చేస్తారని విదేశాంగ శాఖ పేర్కొంది. దేశానికి నిజంగానే ప్రయోజనకరమైతే..సాధారణ రోజుల్లో మోదీ విదేశీ పర్యటనలను ఎవరు వేలెత్తి చూపేవారు కాదు. కాని ఓ వైపు దేశ ప్రజలకు పొదుపు ప్రవచనాలు చెప్పి..మోదీ మాత్రం పాటించకపోవడాన్ని ఎలా అర్ధం చేసుకోవాలంటూ సామాన్యులు ప్రశ్నిస్తున్నారు.

పెట్రోల్, డీజిల్ ఆదా చేయండి, ప్రజారవాణ వినియోంచండి, వంట నూనె తగ్గించండి, బంగారం కొనకండి, ఇంట్లోంచే పని చేయండి, విదేశీ పర్యటనలు చేయకండంటూ మోదీ తాజాగా దేశ ప్రజలకు సూచించిన సంగతి తెలిసిందే. అయితే ప్రధాని సహా ప్రజాప్రతినిధులు ముందుగా పాటించి ప్రజలకు చెప్పాలంటూ అంతే స్థాయిలో కౌంటర్లు సైతం వినిపించాయి. దీంతో ప్రధాని మోదీ సహా కేంద్ర మంత్రులు, పలు రాష్ట్రాల ముఖ్యమంత్రులు, మంత్రులు తమ పర్యటన ఖర్చులను తగ్గించుకునే చర్యలు చేపట్టారు. కాన్వాయ్ ల కుదింపు, అనవసర పర్యటనలు తగ్గించుకుంటున్నట్లుగా రెండు మూడు రోజులు హడావుడి చేశారు. మహారాష్ట్ర, యూపీ, ఢిల్లీ బీజేపీ ప్రభుత్వాలు పొదుపు చర్యల పేరుతో కొన్ని నామామత్ర చర్యలు చేపట్టాయి. అయితే పలుచోట్ల బీజేపీ మంత్రులు, ప్రజాప్రతినిధులు భారీ కాన్వాయ్ లతో మళ్లీ మోదీ పొదుపు మాటలను భేఖాతర్ చేశారు. ఇది ఇలా ఉండగానే ప్రధాని విదేశీ పర్యటనకు వెళ్లడంతో పొదుపు సుద్దులు ప్రజలకేనా?..పాలకులకు కాదా? అంటూ జనం నిలదీస్తున్నారు.